Twitter’da блокланган аккаунтлар келгуси ҳафтада «амнистия» қилинади ва блокдан чиқарилади. Бу ҳақда ижтимоий тармоқнинг янги эгаси Илон Маск маълум қилди.

Аввалроқ Маск «қонунни бузмаган ва даҳшатли спам билан шуғулланмаган» блокланган фойдаланувчиларни «амнистия қилиш» керак ёки керакмаслиги бўйича сўровнома ташкил этган. Ушбу ғояга овоз берган фойдаланувчиларнинг 72,4 фоизи буни ёқлаб чиққан бўлса, 27,6 фоизи қарши чиққан.

«Халқ ўз фикрини билдирди. Амнистия келаси ҳафта бошланади. Воҳ Попули, Воҳ Деи («халқ овози – Худонинг овози»), – деб ёзди Маск.

Associated Press хабарига кўра, Маск АҚШнинг собиқ президенти Доналд Трампнинг Twitter аккаунти қайта тиклангани ҳақида хабар берганида ҳам худди шу иборани ишлатган. Кейин у ижтимоий тармоқ фойдаланувчилари ўртасида Американинг собиқ раҳбарига ўз саҳифасига кириш ҳуқуқини қайтариш-қайтармаслик ҳақида сўров ҳам ўтказган.

Агентлик суҳбатлашган экспертларнинг фикрича, Маскнинг «амнистияси» таъқиблар, нафрат сўзлари ва дезинформациялар кўпайишига олиб келиши мумкин.