Instagram пулли обуна функциясини синовдан ўтказа бошлади
Тармоқ уч турдаги обуна танловини тақдим қилмоқчи.
Instagram обуна функциясини синовдан ўтказишни бошлади. Бу ҳақда ижтимоий тармоқ раҳбари Адам Моссери маълум қилди.
Қайд этилишича, ҳозирча ушбу функциядан америкалик 10 нафар контент яратувчи фойдаланмоқда. Улар орасида рассом Дон Аллен Стивенсон, хонанда Alan Chikin Chow, баскетболчи Седона Принс бор.
Таҳлилчилар Instagram ушбу функция устида ишлаётганини 2021 йилнинг ноябрида пайқаганди. Тармоқ уч турдаги обуна танловини қўшди:
- яшил ранг ўрнига бинафша рангли ҳалқа билан белгиланадиган Stories кўриш учун эксклюзив имконият;
- жонли эфирга эксклюзив кириш;
- постлар шарҳида кўрсатиладиган виртуал белгилар.
Маълум бўлишича, контент яратувчилар ойига 0,99 дан 99,99 долларгача бўлган саккизта обуна нархидан бирини танлаши мумкин бўлади.
«Обуна — белгиланган даромад олишнинг энг яхши усулларидан бири. Бу усул сизнинг мартаба ютуқларингизга боғлиқ эмас. Ижодкорлар ўзлари қилган ишни давом эттиради ва шу орқали тирикчилик қилади», — дейди Моссери.
Аввалроқ Instagram раҳбари Адам Моссери платформанинг 2022 йилги режалари ҳақида сўзлаб берганди.
