Instagram ижтимоий тармоғи илова доирасидаги каналларга пуллик обунани жорий этишга тайёрланмоқда. Бу ҳақдаги маълумотлар АҚШ версияли AppStore’даги Instagram’нинг тавсифида пайдо бўлди.

Маълум қилинишича, пуллик обуна бўлган фойдаланувчилар эксклюзив контентларга кириши мумкин бўлади. Обуна нархи 0,99 доллардан 4,99 долларгача боради.

Илгари ижтимоий тармоқда пуллик хизмат фақатгина Instagram Badges деб номланган виртуал буюмлардан иборат эди. Уларни мухлислар жонли эфир вақтида сотиб олиши ва ижодкорларга совға қилиши мумкин эди. Instagram Badges’нинг нархи ҳам 0,99 доллардан 4,99 долларгачани ташкил этади.

Instagram 2021 йилнинг май ойида пулли обунани жорий этишни кўриб чиқаётганини эълон қилган эди. Компания, шунингдек, фойдаланувчилар муаллифларнинг танланган stories’лари учун алоҳида ҳақ тўлаш имкониятига эга бўлган Exclusive Stories’ни тақдим этишни режалаштирмоқда.

Аввалроқ Apple Watch ва iPhone’га бахтсиз ҳодиса вақти автоматик қўнғироқ қилиш функцияси қўшилиши мумкинлиги ҳақида хабар берилганди.