Испаниянинг энг бадавлат миллиардери Амансио Ортеганинг қизи отаси асос солган Zara, Massimo Dutti ва бошқа брендларга эгалик қилувчи Inditex компаниясига раҳбарлик қилади. Сармоядорларни ҳайратга солган ушбу янгилик фонида компания акциялари нархи 5 фоиздан кўпроққа тушиб кетди.

Дунёнинг энг йирик кийим-кечак сотувчиларидан бири бўлган Испаниянинг Inditex компанияси директорлар кенгашига 2022 йил 1 апрелдан Испаниянинг энг бой миллиардери Амансио Ортеганинг қизи Марта Ортега Перес раислик қилади. Бу ҳақда компания матбуот хизмати хабар берди. Inditex компанияси Zara, Massimo Dutti, Bershka Pull & Bear ва бошқа таниқли кийим брендларига эгалик қилади.

Маълум бўлишича, бу қарор 1975 йилда Inditex компаниясига асос солган Амансио Ортеганинг ўзи ва компания директорлар кенгашининг амалдаги раиси Пабло Исла ташаббуси билан қабул қилинган.

«Ушбу ўзгаришлар билан директорлар кенгаши 2011 йилда Амансио Ортеганинг Inditex директорлар кенгаши раҳбари лавозимидан кетишидан бошланган авлодлар алмашинувини якунлайди», дейилади хабарда.

Bloomberg нашрининг қайд этишича, «узоқ кутилган авлодлар алмашинуви» сармоядорларни ҳайратда қолдирган, чунки авлодлар алмашинуви Inditex бош ижрочи директорининг ўзгариши билан ҳам бирга юз берди.

Alantra Equities консалтинг фирмаси раҳбарият алмашинувини «ёмон хабар» деб атади, чунки Пабло Ислани алмаштириш қийин ва янги бош директор чакана савдо тажрибасига эга эмас. Бундан ташқари, Исла Inditex’га 10 йилдан ортиқ вақт давомида раҳбарлик қилди, шу вақт ичида компаниянинг бозор қиймати олти баравар ошиб, 100 миллиард долларга етди.

«Сўнгги пайтларда испаниялик миллиардернинг қизи Марта Ортега ҳам аста-секин омма эътиборига тушиб, компаниянинг 59 фоиз акцияларига эгалик қилувчи 85 ёшли отаси асос солган бизнесда фаол иштирок этмоқда», деб ёзмоқда Bloomberg.

Марта Ортега сўнгги 15 йил давомида Inditex’да турли лавозимларда ишлаган, бироқ ҳеч қачон юқори бошқарувда бўлмаган. Шу билан бирга, у бир нечта премиум даражадаги тўпламларни тақдим этиб, Zara брендини мустаҳкамлашда фаол иштирок этган.

Маълумот ўрнида, 85 ёшли Амансио Ортега 77 миллиард доллар бойлиги билан Forbes талқини бўйича дунёнинг энг бой одамлари рейтингида 11-ўринни эгаллаб турибди. Унинг бойлиги жорий йилнинг 30 ноябрь ҳолатига кўра, реал вақтда янгиланадиган Forbes Real-Time рейтингида 73,8 миллиард долларга баҳоланмоқда.

«Inditex Zara, Zara Home, Pull & Bear, Massimo Dutti, Bershka, Stradivarius, Oysho ва Uterque дўконларини бошқаради. Кийим-кечак ретейлери Европада биринчилардан бўлиб пандемиядан олдинги савдо ва фойда даражасига эришди, чунки компания онлайн савдони ривожлантиришга эътибор қаратди», деб ёзади Bloomberg.

Иккинчи чоракда Inditex компаниянинг соф фойдаси 850 миллион еврони ташкил этганини маълум қилди, бу 2019 йилнинг шу даврига нисбатан 4 фоизга кўпдир. Коронавирус чекловлари босқичма-босқич юмшатилгани сабабли компаниянинг сотуви кўтарилди.

Аввалроқ миллиардер Рэй Далио АҚШнинг ортаётган давлат қарзи фуқаролар урушига олиб бориши мумкинлигини айтгани ҳақида хабар берилганди.