Италия бозор ва рақобат бошқармаси Apple ва Google’ни маълумотларни қайта ишлаш учун фойдаланувчи розилигини олиш учун «тажовузкор» усуллардан фойдалангани учун 10 миллион евро миқдорида жаримага тортди. Бу ҳақда Италия регуляторининг расмий сайтида хабар берилди.

Маълум қилинишича, компаниялар жарима устидан шикоят қилмоқчи.

«Apple ва Google фойдаланувчи маълумотларидан қандай фойдаланишлари ҳақида ‘аниқ ва ўз вақтида’ маълумот тақдим этмади», — дейилади Италия регулятори баёнотида.

Google хизматларида ҳисоб қайдномасини яратишда фойдаланувчи рўйхатдан ўтиш учун маълумотлардан фойдаланиш шартларини қабул қилиши керак. Компания маълумотларни узатиш ва қайта ишлашга розиликни олдиндан белгилаб қўйган, аммо фойдаланувчиларга ўз танловини қайтариб олиш ёки ўзгартириш имкониятини бермаган.

Apple ҳам фойдаланувчиларга танлаш имкониятини бермайди. Компания шахсий маълумотлар тижорат мақсадларида тўпланганлиги ҳақида огоҳлантирмайди. Бунинг ўрнига, Apple маълумотлар хизматлар сифатини яхшилаш учун кераклигини маълум қилади.

Регуляторга кўра, ҳар икки ҳолатда ҳам фойдаланувчилар платформалар шартларини қабул қилишга мажбур бўлади. 10 миллион евро миқдоридаги жарима бундай ҳуқуқбузарлик учун максимал миқдордир. Apple ва Google бу қарор устидан шикоят қилиши ҳақида баёнот берди.

Аввалроқ Хитой ҳукумати Alibaba’ни монополияга қарши қонунни бузгани учун жаримага тортгани ҳақида хабар берилганди.