Машҳур ижтимоий тармоқларга эгалик қилувчи ва уларни бошқараётган миллиардерлар бир кунда 10 миллиард доллар йўқотди. Бу ҳақда Forbes нашри ёзмоқда.

Маълум қилинишича, ушбу воқеа 24 май куни акцияларнинг кескин пасайишидан кейин содир бўлди. Уларнинг қиймати пандемия даврида, фойдаланувчилар ўз уйларини зўрға тарк этиб, кўпроқ вақтни интернетда ўтказганларида «осмонга кўтарилган», ҳозир эса «Ерга қайтмоқда».

Facebook, Instagram ва WhatsApp мессенжерига эгалик қилувчи Meta’нинг қимматли қоғозлари 7,6 фоизга арзонлашди. Маълумотларга кўра, компания асосчиси Марк Цукербергнинг бойлиги бир кунда 5,2 миллиард долларга камайди.

Ҳозирда унинг бойлиги 65,1 миллиард долларга баҳоланмоқда ва тадбиркорнинг ўзи энг бой бизнесменлар рейтингида 16-ўринга тушиб кетди.

Twitter асосчиси Жек Дорси 405 миллион долларга камбағаллашди. Унинг бойлиги 4,9 миллиард долларга баҳоланган. 

Илон Маскнинг харид режалари бўйича ноаниқлик фонида  24 май куни микроблоглар платформаси акциялари 5 фоизга тушиб кетди.

Pinterest акцияларининг қиймати бир кунда 24 фоизга тушиб кетди. Ижтимоий тармоқ асосчиларидан Бен Зильберманн ва Пол Скьярра мос равишда 290 миллион доллар ва 218 миллион доллар йўқотди. Ҳозирда иккаласининг бойлиги ҳам ҳам 1,1 миллиард долларга баҳоланмоқда.

Фото ва видео алмашиш иловаси — Snapchat эгаси Snap энг катта пасайиш қайд этди. Компания акциялари 43 фоизга қулади ва бошқа ижтимоий тармоқларни ҳам ўзлари билан «тортиб кетди», бу эса инвесторларда ваҳима қўзғатди.

Бунинг олдидан иккинчи чорак учун компаниянинг янгиланган йўриқномаси чиқарилди, унга кўра Snap дастлаб тахмин қилинганидан камроқ даромад ва фойда олиши кутилмоқда.

Шу фонда компания ҳаммуассиси ва бош директори Эван Шпигелнинг бойлиги 1,7 миллиард долларга (-35 фоиз) камайди ва ҳозирда 3,1 миллиард долларга баҳоланмоқда.

Snap асосчиси Бобби Мерфининг бойлиги 1,9 миллиард долларга камайиб, 2,9 миллиард долларга тушди.

Бироқ куни 24 май куни муаммолар нафақат ижтимоий тармоқлар эгалари орасида эди.

Google акциялари бир кунда 5 фоизга арзонлашди, IT гиганти асосчилари Сергей Брин ва Ларри Пейжнинг бойлиги биргаликда 9 миллиард долларга камайди. Ҳозирда уларнинг капитали мос равишда 88,3 миллиард ва 91,7 миллиард долларга баҳоланмоқда.