Дунёнинг энг бой одамлари учун 2021 йил анча сермаҳсул бўлди. Умуман олганда, 2660 нафар миллиардернинг молиявий ҳолати январдан декабргача 1,6 триллион долларга ўсди. Бироқ ўтган йилда нафақат улкан даромадлар, балки колоссал миқдорда зарар кўриш ҳолатлари ҳам кузатилди.

2021 йилда энг катта зарар кўрган 10 нафар миллиардер жами 152 миллиард доллар йўқотди. Қуйида шу ҳақда сўз боради.

Ўтган йилда энг кўп йўқотиш хитойлик бизнесменларда кузатилди. 2021 йилда энг кўп зарар кўрган 10 нафар миллиардернинг 6 нафари айнан Хитой ҳиссасига тўғри келади.

Хитой расмийлари онлайн савдодан тортиб репетиторликгача бўлган бир қатор соҳалар бўйича тартибга солишни кучайтирмоқда. Шу сабаб мамлакатда кўплаб тадбиркорлар мол-мулк, қимматли қоғозлар ҳамда акцияларни сотишга тушиб қолган. Ушбу тенденция Хитой компанияларининг қийматини юзлаб миллиард долларга пасайтирмоқда.

• Колин Чжэн Хуан
• Фуқаролиги: Хитой
• Йўқотиш: 40,2 миллиард доллар
• Молиявий ҳолати: 22,4 миллиард доллар

Хитойда қонунчиликнинг «қаттиқлашувидан» Pinduoduo савдо платформаси асосчиси Чжэн Хуан каби зарар кўрган бизнесмен бўлмаса керак. Миллиардер бу йил 64 фоизга қашшоқлашди, чунки Pinduoduo акциялари ҳам тахминан шунча пасайди.

Олти ёшли компания, аллақачон, Хитой интернет корпорацияларига қарши кенг қамровли текширувларга дуч келган. Pinduoduo йилига фаол харидорлар сони бўйича Alibaba’дан ўзиб кетганидан кўп ўтмай, март ойида Чжэн Хуаннинг тўсатдан компания бошқарувидан кетиши яна бир зарба бўлди. Ноябрь ойида компаниянинг чораклик даромадлари прогноз қилинганидан паст бўлгани сабаб унинг акциялари 21 фоизга арзонлашди.

• Жек Ма
• Фуқаролиги: Хитой
• Йўқотиш: 21,4 миллиард доллар
• Молиявий ҳолати: 37 миллиард доллар

Бир пайтлар Хитойнинг энг бой одами ва очиқ фаолият олиб борувчи миллиардерларидан бири бўлган Ма 2021 йилнинг кўп қисмини жамоатчиликдан яширинган ҳолда ўтказди. Бунга ҳукумат томонидан унинг компанияларига қарши «қаттиқ» чоралар кўрилгани сабаб бўлди.

Апрель ойида Хитой ҳукумати Ма томонидан асос солинган Alibaba электрон бозорига 2,8 миллиард доллар жарима солди. Бу Хитой тарихидаги монополияга қарши энг юқори жаримадир. Ҳукумат Alibaba рақобат қонунларини бузганлигини даъво қилиб, шундай қарорга келган.

• Хуэй Ка Янь
• Фуқроллиги: Хитой
• Йўқотиш: 18 миллиард доллар
• Молиявий ҳолати: 9,1 миллиард доллар

Хитойлик миллиардер Хуэй кетма-кет иккинчи йил энг кўп бойлик йўқотган тадбиркорлар рейтингидан жой олмоқда. Бунга China Evergrande Group’нинг молиявий инқирозни бошдан кечираётгани сабаб бўлмоқда.

Хуэй томонидан асос солинган кўчмас мулк гиганти биринчи марта 2021 йил декабрь ойида глобал инвесторлар олдидаги қарзларни тўлашни тўхтатишини эълон қилди.

Хабарларга кўра, компанияни сақлаб қолиш учун Хуэй яқинда муаммолар ичиқда қолаётган биснесига шахсий маблағларидан 1 миллиард доллар сармоя киритган ва гаровга қўйилган акцияларини сотишга ҳам мажбур бўлган.

Evergrande’нинг айни вақтдаги қарзи 300 миллиард долларга баҳоланмоқда. Ушбу компаниянинг инқирози нафақат бутун мамлакат, балки бутун дунё кўчмас мулк бозорини хавф остида қолдириши мумкин. Шу сабаб Хуэйга нисбатан босим ҳар қачонгидан ҳам баланд.

• Чжан Юн
• Фурололиги: Сингапур
• Йўқотиш: 15,9 миллиард доллар
• Молиявий ҳолати: 7,6 миллиард доллар

Чжан бутун дунё бўйлаб жойлашган энг йирик Хитой ресторанлар тармоғи — Haidilao асосчиси ва раиси ҳисобланади. Йиллар давомида жадал ўсишдан дадил бўлган гигант ресторан пандемия даврида ўзининг энг катта кенгайиши бўйича «хавфли юриш»ни амалга оширди: муассасалар сонини икки бараварга кўпайтирди.

Афсуски, COVID-19’нинг янги тўлқини ва пандемия даврида хўрандаларнинг умумий овқатланиш жойларига муносабатининг кескин ўзгариши Haidilao’га бўлган талабнинг пасайишига олиб келди.

2021 йилнинг ноябрь ойида компания йил охиригача 300 та савдо шохобчасини ёпишини эълон қилди. Шунингдек, 15 декабрь ҳолатига кўра, акциялар йил давомида 71 фоизга тушиб кетгани маълум бўлди.

• Тадаси Янаи
• Фуқаролиги: Япония
• Йўқотиш: 14 миллиард доллар
• Молиявий ҳолати: 30,4 миллиард доллар

2021 йилда Uniqlo ва Theory машҳур брендларига эгалик қилувчи Токиодаги кийим-кечак империяси Fast Retailing акциялари 34 фоизга тушиб кетганидан кейин Янаи бойлигининг учдан бир қисмини йўқотди.

Бундан ташқари, унинг Вьетнамдаги заводлари ҳам зарар кўрди. Компания, шунингдек, Мьянмадаги ҳарбий тўнтариш сабаб етказиб берувчилар билан муаммоларга дуч келди.

• Лэй Цзюнь
• Фуқаролиги: Хитой
• Йўқотиш: 14 миллиард доллар
• Молиявий ҳолат: 16,3 миллиард доллар

Дунёдаги энг машҳур смартфон брендларидан бири бўлган Xiaomi асосчиси ва раҳбари Лэйнинг бойлиги 2021 йилда деярли икки баробар қисқарди.

Xiaomi Хитойнинг бошқа ИТ гигантларига зарар етказган расмийларнинг «қаттиқ» назоратидан қочиб қутулган бўлса-да, компания логистик муаммоларга, аниқроғи глобал чип танқислигига дуч келди.

• Масаеси Сон
• Фуқроллиги: Япония
• Йўқотиш: 13,6 миллиард доллар
• Молиявий ҳолати: 25,1 миллиард доллар

Хитой фирмаларини қийнаётган ноаниқликлар Япония инвестиция гиганти Softbank Group асосчиси ва бош директори Масаеси Сонга ҳам катта таъсир кўрсатди. Чунки Softbank Group’нинг асосий сармоялари рўйхатига Хитойнинг кўплаб ИТ-компаниялари, жумладан, Alibaba ва Didi Global’нинг такси иловаси киради.

• Дэниел Гилберт
• Фурололиги: АҚШ
• Йўқотиш: 13,2 миллиард доллар
• Молиявий ҳолати: 29,6 миллиард доллар

2021 йил Дэниел Гилбертнинг Rocket Companies номли ипотека фирмаси учун қийин йил бўлди. Март ойида қисқа вақт ичида унинг бойлиги 80 миллиард долларга кўтарилганида миллиардер дунёнинг энг бой ўн нафар одами қаторига кирганди.

Бироз вазият тез ўзгарди. 15 декабрь ҳолатига кўра, онлайн кредиторнинг акциялари 62 фоизга тушиб кетди, чунки даромадлар ўсиши ипотека кредитини қайта молиялаштиришга бўлган талаб ошган 2020 йил — «гуллаган давр»га нисбатан секинлашди.

Rocket жорий йилнинг июнидан сентябрь ойигача бўлган даврда компаниянинг соф даромади 1,4 миллиард долларга тенг бўлгани ҳақида хабар берди. 2020 йилнинг шу даврида эса компания 3 миллиард доллар миқдорида соф даромад кўрган эди.

• Чжан Бансинь
• Фуқаролиги: Хитой
• Йўқотиш: 11,3 миллиард доллар
• Молиявий ҳолати: 1,2 миллиард доллар

Хитой ўқитувчилари учун 2021 йил омадли кечмади. TAL Education асосчиси ва раиси Чжан буни тасдиқлаши мумкин. Ўтган йилда Хитой ҳукумати мактаб ўқувчиларига таълим хизматлари кўрсатувчи компанияларга қарши «уруш эълон қилди».

Расмийларнинг айтишича, пандемия даврида гуллаб-яшнаган саноат болалар ва ота-оналарга ҳаддан ташқари босим ўтказмоқда ва «капиталистлар назорати остида» бўлиб турибди.

Ҳукумат қатъий янги талабларни, жумладан, хорижий инвесторлардан капитал жалб қилишни тақиқлагандан сўнг, TAL Education каби компанияларнинг акциялари кескин тушиб кетди.

• Чжун Хуэйцзюань
• Фуқаролиги: Хитой
• Йўқотиш: 10,4 миллиард доллар
• Молиявий ҳолати: 10 миллиард доллар

Чжун Хитойнинг Hansoh Pharmaceutical фармацевтика компанияси асосчиси, раиси ва бош директоридир. У 2019 йилда биржага чиққанида дунёдаги энг бадавлат аёллардан бирига айланди, шундан сўнг унинг акциялари 130 фоиздан ошди.

Чжун ва унинг қизи биргаликда компаниянинг тўртдан уч қисмига эгалик қилади. Бироқ 2021 йилда компания акциялари 50 фоиздан кўпроққа тушиб кетди. Бунинг оқибатида 2021 йил Чжуннинг бойлиги 51 фоизга камайди.

Аввалроқ қозоғистонлик миллиардерлар тартибсизликлардан кейин қанча бойлигидан айрилгани маълум бўлганди.