«Кўп рекламаларни каналларнинг ўзи фильтр қилади» — Низомиддинов соҳадаги цензура ҳақида
Ижодкорликдан фойдаланиш учун чекловлар камроқ бўлиши кераклиги айтилди.
Тажрибали маркетолог, FCB Artgroup агентлиги креатив директори Шоҳруҳ Низомиддинов Kommers.uz билан суҳбатда реклама роликларини эфирга узатишдаги цензура ҳақидаги фикрлари билан ўртоқлашди.
«Бизда цензура ҳали ҳам қаттиқ. Кўп рекламаларни каналларнинг ўзи фильтр қилади. ‘Унисини олиб ташлагин, бунақа кўйлак киймасин, бунақа соч бўлмасин, соқоли бўлмасин’ деган гаплар бизда ҳали ҳам кўп», — дейди у.
Шоҳруҳ Низомиддиновнинг фикрича, цензура реклама қонунига асосланган бўлиши керак.
«Реклама ролиги реклама қонунига зид бўлмаса, масалан соқол тўғрисида қонунчиликда ҳеч нима дейилмаган. Демак, [соқол аск этган] реклама ролиги чиқишга ҳақи бор. Цензура қилиш керак эмас. Агар телевизион каналда кимдир ‘мана шу боланинг соқоли, унинг узунлиги ёқмаяпти’ деса, бу энди қонунга зид», — дейди у.
Kommers.uz суҳбатдошининг сўзларига кўра, ҳаддан ташқари кучли цензура ижодкорликнинг ўлишига олиб келади.
«Ҳозирги кунда истеъмолчининг эътиборини жалб қилиш жуда қийин. Чунки қўлингизда телефон бор. У ерда эса Telegram каналлар, Facebook, Instagram ва TikTok бор. Ҳаммаси ҳар томондан эътиборингизни ўзига жалб қилишга ҳаракат қилади. Бундан ташқари, кўчада ташқи реклама бор, телевидение бор. Ҳаммаси сизнинг эътиборингиз учун курашяпти», — дейди у.
Таъкидланишича, эътиборни жалб қилиш учун компания ижодкорликка мурожаат қилади. Креативдан фойдаланиш учун эса албатта чекловлар камроқ бўлиши керак.
Аввалроқ Шоҳруҳ Низомиддинов йирик брендларнинг Ўзбекистонга кириши нега кечикаётгани бўйича ўз фикрлари билан ўртоқлашганди.