Ўзбекистон Коррупцияга қарши курашиш агентлиги ва «Минтақавий мулоқот» халқаро нодавлат ташкилоти вакиллари ўртасида 29 октябрь куни учрашув ташкил этилди. Бу ҳақда агентлик матбуот хизмати хабар берди.

Маълум қилинишича, тадбир аввалида агентлик директори Акмал Бурхонов октябрь ойида Словенияга амалга оширган хизмат сафари юқори даражада ташкил этилганлигини эътироф этган. Шунингдек, ташриф давлатлар ўртасида тажриба алмашиш ва ҳамкорлик алоқаларини ривожлантиршга мустаҳкам асос яратганини таъкидлаб ўтган.

Таъкидланишича, учрашув давомида ўзаро ҳамкорлик доирасида бир қатор янги лойиҳаларни амалга ошириш масалалари муҳокама этилган. Хусусан:

• «Минтақавий мулоқот» ва АҚШнинг Наркотик моддалар халқаро айланмасига қарши кураш ва ҳуқуқни муҳофаза қилиш фаолияти бюроси кўмагида Американинг бир қатор ташкилот ва идоралари (АҚШ Федерал суд маркази, Этика бюроси, Федерал қидирув бюроси, Федерал савдо маркази) билан ҳамкорлик алоқаларини ўрнатиш;
• коррупцияга қарши курашиш соҳасида сунъий интеллект имкониятларидан кенг фойдаланишни йўлга қўйиш учун халқаро экспертни жалб этиш;
• ҳамкорликда қўшма тадқиқотларни ўтказиш каби масалалар муҳокама қилинган.

Қайд этилишича, учрашувда томонлар келгусидаги ҳамкорлик йўналишларини кенгайтириш ва алоқаларни янада мустаҳкамлаш, илгари сурилган лойиҳаларни ишчи тартибда кўриб чиқишни давом эттиришга келишиб олган.

Аввалроқ «Ўзсаноатқурилишбанк» коррупцияга қарши курашиш бўйича халқаро менежмент жорий қилиши ҳақида хабар берилганди.