Лукашенко Беларусга қарши санкцияларга муносабат билдирди
Беларусь Президенти Минск ва Москвага қарши санкцияларни қабул қилганлар охир-оқибат кечирим сўрашини таъкидлади.
Беларусь Президенти Александр Лукашенко Беларусга қарши санкцияларга муносабат билдирди. Бу ҳақда «Интерфакс» хабар берди.
Лукашенконинг фикрича, Минск ва Москвага қарши санкцияларни қабул қилган давлатлар охир-оқибат кечирим сўраб, ҳамкорлик қилишни илтимос қилади. У бу ҳақда Раубичидаги «Минск тоғ-чанғи» мусобақасида маълум қилди.
«Сиз Европанинг Россияга қарши ақлдан озган санкцияларини кўрмоқдасиз. Россия Беларусь орқали санкцияларни четлаб ўтмаслиги учун Бизни ҳам бунга аралаштиришди. Хўш, нима дейиш мумкин? Мушуклар дам олмоқда», — деди у.
Қайд этилишича, Лукашенко Халқаро мушуклар федерацияси (FIFE)нинг Россиядан келган мушукларни халқаро кўргазмаларда қатнашишни тақиқлаш ташаббусини назарда тутган.
Унинг таъкидлашича, Россияда кўплаб Беларусь лойиҳалари амалга оширилмоқда. Шунингдек, уларни Россия томони қўллаб-қувватламоқда.
«Келинг, сабр қилайлик. Бир йил сабр қиламиз, кейин кўрасиз — улар олдимизга келишади, кечирим сўраб, улар билан ҳамкорлик қилишимизни сўрашади», — деди Беларусь Президенти.
Аввалроқ Лукашенко Украинанинг Беларусь калийли ўғитларидан воз кечганини айтгани хабар қилинганди. Шунингдек, JPMorgan Россияни 1998 йилдаги каби иқтисодий инқироз хавфидан огоҳлантиргани ҳақида хабар берилди.
