Марказий банк бошқарувининг 2021 йил 21 октябрдаги йиғилишида «Пул-кредит сиёсатининг 2022 йил ва 2023–2024 йиллар даврига мўлжалланган асосий йўналишлари»нинг дастлабки концептуал лойиҳаси маъқулланди. Бу ҳақда банк матбуот хизмати хабар бермоқда.

Маълум қилинишича, макроиқтисодий ривожланишнинг асосий сценарийсидаги бир қанча омиллар ва тартибга солинадиган нархларни эркинлаштириш даражасидан келиб чиқиб инфляция суръатларининг 2022 йилда 8–9 фоизни ташкил этиши, 2023–2024 йилларда эса 5 фоизгача пасайиши кутилмоқда.

Шунингдек, сценарий доирасидаги ҳисоб-китобларга кўра, 2022 йилда ялпи ички маҳсулот ҳажми ўзининг потенциал даражасига кўтарилиб, реал иқтисодий ўсиш суръатлари 5,5–6,5 фоизни ташкил этади ва 2023–2024 йилларда 6 фоиз атрофида бўлиши прогноз қилинмоқда.

Хабарга кўра, келгуси йилларда мамлакатда макроиқтисодий барқарорликни таъминлаш вазифаси 2022 йилдан босқичма-босқич фискал консолидация бошланишини тақозо қилади ва фискал тақчилликнинг ЯИМга нисбати 2023–2024 йилларда 2–3 фоиз атрофида шаклланиши прогноз қилинмоқда.

Аввалроқ Ўзбекистонда иқлим ўзгаришлари пул-кредит сиёсатига таъсир кўрсатгани маълум бўлганди.