Маск ва SEC можароси: миллиардер ташкилотни ўзи ҳақидаги тергов маълумотларини сиздиришда айблади
Илон Маск олдинроқ унинг сўз эркинлигини чеклашга уриниш бўлаётганини даъво қилганди.
Tesla бош директори Илон Маск АҚШ Қимматли қоғозлар ва биржалар комиссиясини (SEC) ўзидан ўч олиш мақсадида федерал тергов ҳақидаги маълумотларни сиздирганликда айблади. Бу ҳақда CNBC хабар берди.
«Комиссия менинг мижозларимдан ўзларининг конституцион ҳуқуқларидан фойдаланганликлари учун қасос олаётгани тобора равшан бўлиб бормоқда — охирги пайтларда улар Комиссияни очиқ маълумотларда танқид қилган ва ёрдам сўраб ушбу судга мурожаат қилган», дейилади Маскнинг адвокати Алекс Спиро томонидан АҚШ округ судьяси Алисон Натанга ёзилган мактубда.
Мактуб Маскнинг SEC унга қарши доимий тергов олиб бориш билан таъқиб қилаётганини айтганидан тўрт кун ўтиб юборилган. Комиссия, Маскнинг сўзларига кўра, унинг сўз эркинлиги ҳуқуқини чеклашга ҳаракат қилмоқда. Шунингдек, ташкилот Tesla ва Маск қимматли қоғозлар бўйича фирибгарлик айбловларини ҳал қилиш учун аввалроқ жарима тўлаган акциядорларга 40 миллион доллар ўтказиш бўйича ўз мажбуриятларини эътиборсиз қолдирмоқда.
Спиро SEC’га қандай тергов ва қандай маълумотлар сиздирилган бўлиши мумкинлигига аниқлик киритмаган. Мактубда у SEC ходимларидан бири «унинг терговига оид баъзи маълумотларни» ошкор қилганини даъво қилади, бошқаси эса ҳеч қандай тасдиқловчи далиллар келтирмаган.
Маск ва SEC ўртасидаги зиддият 2018 йил сентябрида, тартибга солувчи орган тадбиркорни инвесторларга «нотўғри ва чалғитувчи» баёнотларда айблаган пайтда бошланган. Ўшанда МасPostк Twitter’да Tesla’ни ҳар бир акция учун 420 доллардан кенг миқёсда хусусий сотиб олиш учун етарли маблағ олганини айтган. Бироқ, келишув ҳеч қачон амалга ошмаган.
Маск ва Tesla 20 миллион доллар жарима тўлаши керак эди, Маск, шунингдек, қайта кўриб чиқилган келишув битими доирасида уч йилга директорлар кенгаши раиси лавозимини тарк этишга мажбур бўлган. Бундан ташқари, Tesla Маскнинг компания ҳақидаги баёнотларини жамоатчиликка Twitter’да, блогда ёки бошқа ахборот воситаларида мониторинг қилиш тизимини ҳам жорий қилиши керак эди.
Аввалроқ Илон Маск АҚШ расмийларини сўз эркинлигини чеклашга уринишда айблагани хабар қилинганди. Шунингдек, Маскнинг компанияси ҳайвонларга шафқатсиз муносабатда бўлгани ҳақидаги айбловларни рад этгани ҳақида хабар берилди.
