Маскнинг ҳазилидан сўнг «Манчестер Юнайтед» акциялари қимматлашди
Илон Маск Twitter’да «Манчестер Юнайтед»ни сотиб олаётгани ҳақида ёзиб, кейинчалик бунинг ҳазил эканини таъкидлади. Ушбу ҳазилдан сўнг клуб акциялари премаркет савдоларида 17 фоизга қимматлашди.
«Манчестер Юнайтед» футбол клуби акциялари миллиардер Илон Маскнинг Twitter’да инглиз жамоасини сотиб олиш ҳақида ҳазиллашганидан кейин премаркет савдоларида 17 фоизга қимматлашди.
Tesla ва SpaceX раҳбари Илон Маск Twitter’да «Манчестер Юнайтед»ни сотиб олаётгани ҳақида ёзди. Обуначиларнинг саволларига жавобан у баёнотни жиддий қабул қилмаслик кераклигини таъкидлади.
«Бу Twitter’даги эски ҳазил. Мен ҳеч қандай спорт жамоаларини сотиб олмайман», — деб ёзди у.
Шундан сўнг «Манчестер Юнайтед» футбол клуби акциялари ремаркет савдоларида 17 фоизга қимматлашди.
Кейинчалик акция ўсишдан тўхтади. Москва вақти билан 17 август соат 23:00 ҳолатига кўра, премаркетда клубнинг битта акциясининг нархи 5,16 фоиз ўсиш билан 13,44 долларни ташкил этди.
«Манчестер Юнайтед» акцияси нархи 16 август куни савдолар якунига кўра, 12,78 долларга тенг эди.
Агар Маскнинг сўзлари ҳазил бўлмаганида унга «Манчестер Юнайтед»ни сотиб олиш компаниянинг фонд бозори капиталлашувидан келиб чиққан ҳолда тахминан 2 миллиард долларга тушарди.
Шу билан бирга Маск агар қайсидир футбол клубини сотиб олса, бу «Манчестер Юнайтед» бўлишини тан олди.
«Улар болалигимда менинг севимли жамоам эди», — деб ёзди миллиардер.
Маскнинг «Манчестер Юнайтед»ни сотиб олиши ҳақидаги твитига 780 мингдан ортиқ «лайк» йиғилди ва 166 минг мартадан ортиқ баҳам кўрилган.
Шу билан бирга, баъзи мухлислар Маскни Англия Премьер-лигаси стартилаги иккита ўйинда мағлубиятга учраган ва турнир жадвалида сўнгги поғонада турган клубни сотиб олиш ҳақида ўйлаб кўришга чақирди.