McDonald’s метаоламда ресторан очади
Компания АҚШ Патент ва савдо белгилари бўйича идорасига 10 та ариза топширди.
McDonald’s метаоламда онлайн ва реал дунёда овқат етказиб берадиган ресторан очади. Бу ҳақда Business Insider хабар берди.
Маълум қилинишича, McDonald’s фаст-фуд ресторанлари тармоғи бир нечта савдо белгиларини, жумладан, озиқ-овқат етказиб берадиган виртуал ресторанни рўйхатдан ўтказган. Компания АҚШ Патент ва савдо белгилари бўйича идорасига 10 та ариза топширган.
Савдо белгиларидан бири виртуал озиқ-овқат ва ичимликлар, шу жумладан NFT учун, иккинчиси эса уйга етказиб бериш опциясига эга виртуал ресторан бошқаруви учун мўлжалланган.
Савдо белгиси бўйича ҳуқуқшунос Жош Гербеннинг тушунтиришича, савдо белгилари McDonald’s’нинг виртуал ва ҳақиқий таомларни сотиши мумкин бўлган метаоламдаги ресторан бўйича ғоясини ҳимоя қилади.
«Сиз метаоламда базмдасиз ва, табиийки, оч қоласиз. Эшитиш воситасини ечиб олишингиз шарт эмас. Сиз McDonald’s’га бориб, буюртма берасиз. Овқатингиз тез орада эшигингизга етказилади», — дейди Гербен.
McDonald’s, шунингдек, McDonald’s ва McCafe брендлари остида ҳақиқий ва виртуал концертларни ўз ичига олган кўнгилочар хизматлар ва тадбирлар учун савдо белгисини ҳам рўйхатдан ўтказган.
«Ўйлайманки, келгуси йил ичида эсингизга келган ҳар бир бренд ушбу аризаларни топшириши кўрасиз. Фикримча, ҳеч ким яқинлашиб келаётган янги технологияларни бутунлай эътиборсиз қолдирмоқчи эмас», дея қўшимча қилган адвокат.
Аввалроқ Илон Маск McDonald’s’ни Dogecoin криптовалютасини қабул қилишга чақиргани хабар қилинганди. Шунингдек, метаоламда 2021 йил кўчмас мулк сотуви 500 миллион доллардан ошгани ҳақида хабар берилди.