Ресторатор Санжар Мақсудов Kommers.uz’га берган интервьюсида ўз тажрибасидан келиб чиқиб, Мустақил Давлатлар Ҳамдўстлиги мамлакатлари орасида ресторан бизнеси кўпроқ Россияда, аниқроғи унинг пойтахти Москвада ривожланганини таъкидлади.

Шунингдек, нашр суҳбатдоши россиялик соҳа бизнесменлари Ўзбекистондан ўрганса бўладиган бир жиҳатга тўхталиб ўтган.

«Москвани дунё гастрономик пойтахтларидан бири деб биламан. Битта Лондонда бўлмаганман, бошқа кўп жойларда бўлганман. Лекин Москва ҳаммасидан устун туради. Ресторан соҳасидаги даражаси жуда баланд. У ерда бор ресторанлар бошқа ҳеч қаерда йўқ: таом, сервис, дизайн, ички муҳит барчаси жуда сифатли», — дейди у.

Санжар Мақсудовнинг сўзларига кўра, бундай профессионал ёндашувни ўзбекистонликлар ўрганса бўлади.

«Яхши томони бизнинг жуда кўп ҳамюртларимиз у ерда ишлаяпти. Официант бўлиб ишлайди, менежер бўлиб ишлайди. Ошпазлар жуда кўп. Улар ўша ерга бориб ўрганиб, тажрибасини бу ерга олиб келмоқда. Шу сабаб охирги пайтларда бизда ҳам яхши ресторанлар очиляпти. Янги-янги тадбиркорлар чиқиб келмоқда», — дейди у.

Ўз навбатида, Kommers.uz суҳбатдоши Москва ва умуман Россиядаги тадбиркорлар Ўзбекистондан ўрганиши мумкин бўлган ресторан бизнесининг жиҳатлари ҳақида сўзлаб берди.

«Улар биздан «масштабность»ни ўрганиши мумкин. Масалан Москвада минг нафар одам кирадиган ресторан топиш қийин. Бизда эса истаган Milliy Taomlar тўлиб туради. Кунига 5-6 минг одам кириб, чиқиб кетиши оддий нарса. Улар учун эса ваҳимали ҳолат», — дейди у.

Бизнесменнинг айтишича, агар Москвада ҳам Тошкентда бўлгани каби арзон, сифатли ош маркази очилса, у ҳам Ўзбекистондаги каби муваффақиятли бўлади.