Меҳнат инспекцияси NestOne ишчилари норозилик уюштиргани бўйича изоҳ берди
«Оzguvn mimarlik inshaat» МЧЖ ХК ва «Оzguven tasarim mimarlik» МЧЖ шаклидаги хорижий корхонаси раҳбари Гувен Меҳметра номига ёзма кўрсатма берилди.
Тошкент шаҳар меҳнат инспекцияси томонидан 2022 йил 17 май куни Шайхонтоҳур туманидаги Tashkent city ҳудудида қурилаётган NestOne биносида ишлаётган ишчиларга ишчиларга иш ҳақи ўз вақтида берилмагани юзасидан ўрганиш ўтказди. Бу ҳақда Меҳнат вазирлиги матбуот хизмати хабар берди.
Аниқланишича, NestOne биносида «Оzguvn mimarlik inshaat» МЧЖ ХКнинг 312 нафар ишчиси 2022 йил апрель учун учун иш ҳақларини олмагани сабабли мазкур корхонага нисбатан норозилик билдирган.
Ўрганиш жараёнида 17 май куни 312 нафар ишчига 1 миллиард 7 миллион 1 825 минг сўм иш ҳақлари тўлаб берилиши таъминланган.
Шу билан бир қаторда, NestOne биносида «Оzguven tasarim mimarlik insaat sanayi ve ticar»нинг 427 нафар ишчилари 2022 йил апрель ойи учун иш ҳақини ўз вақтида олмагани сабабли мазкур корхона раҳбариятига норозилик билдирган.
Мазкур ҳолат юзасидан 17 май куни 427 нафар ишчига 1 миллиард 346 миллион 355 минг 177 сўм иш ҳақлари тўлаб берилиши таъминланган.
Бундан ташқари, Вазирлар Маҳкамасининг «Давлат меҳнат инспекцияси тўғрисида»ги 1066-сонли низомига мувофиқ, Тошкент шаҳар Давлат меҳнат инспекцияси томонидан 17 май куни «Оzguvn mimarlik inshaat» МЧЖ ХК ва «Оzguven tasarim mimarlik» МЧЖ шаклидаги хорижий корхонаси раҳбари Гувен Меҳметра номига ёзма кўрсатма берилган.
Эслатиб ўтамиз, аввалроқ Тошкент шаҳрида қурилаётган NestOne мажмуаси қурувчилари маош берилмаётгани сабабли норозилик уюштиргани ҳақида хабарлар тарқалди. Тадбиркор Мурод Назаров ушбу хабарларга жавоб тариқасида Instagram’да жонли эфирга чиқди.
«Мен ҳозир NestOne’даман. Ижтимоий тармоқларда ваҳима қилиб, чарчатиб юбординглар. Тўғрисини айтаман. Мана, жонли эфирга чиқдим. Ваҳима қилманглар. Ош емаганинглар учун (Мурод Назаров бир неча кун аввал бинонинг 51-қаватида ош тайёрлаган эди — таҳр.) алам олиш ундай бўлмасин, илтимос. Ҳаммаёқ тинч. Нима кераги бор ваҳима қилишни? Ҳаммаси зўр кептяпти. Битта ош қилиб балога қолдим», — дейди Мурод Назаров.
Тадбиркор ош сабаб ваҳима кўтарилган ҳақида мутойиба ёки ҳақиқатни айтгани бўйича аниқ маълумот йўқ.
Ижтимоий тармоқларда тарқалган видеоларда эса бир гуруҳ қурувчилар пойтахтдаги Ботир Зокиров кўчасида тўпланганини кўриш мумкин.