Meta икки йиллик блокировкадан сўнг АҚШнинг собиқ президенти Дональд Трампнинг Facebook ва Instagram аккаунтларини тиклади. Бунга биринчи бўлиб Reuters эътибор берди.

Январь ойида Meta компаниясининг глобал масалалар бўйича президенти Ник Клегг сиёсатчининг Facebook ва Instagram’даги аккаунтларини тиклаш режасини эълон қилган эди. Унинг тушунтиришича, блокировка Трампнинг 2024 йилги президентлик сайловларида қатнашиш режалари туфайли бекор қилинади.

Шу билан бирга, Клегг таъкидлаганидек, ижтимоий тармоқлар қоидаларини қайта бузса, АҚШнинг собиқ президенти қолганларга қараганда жиддийроқ жазога тортилади: агар Трамп Meta қоидаларига зид контентни чоп этса, тегишли пост ўчириб ташланади ва аккаунтнинг ўзи яна бир ойдан икки йилгача бўлган муддатга блокланади.

Шунингдек, Трамп 34 ва 23 миллион обуначига эга бўлган Facebook ва Instagram’га қайтадими ёки йўқми, номаълум. Илгари унинг аккаунти Twitter томонидан блокдан чиқарилган эди, бироқ ҳозирча сиёсатчи у ерда ҳеч нарса нашр этмаган.

Эслатиб ўтамиз, ижтимоий тармоқлар 2021 йил 6 январда бўлиб ўтган Капитолийга бостириб киришдан кейин Дональд Трампнинг аккаунтларига тақиқ қўйганди. Хусусан, Meta компаниянинг ижтимоий тармоқларида тартибсизликларни қўллаб-қувватлагани учун собиқ президентнинг саҳифасини блокировка қилган.