Тўртта асосий метаоламда 2021 йил виртуал кўчмас мулк сотуви 501 миллион долларга етди. Бу ҳақда АҚШнинг CNBC телеканали MetaMetric Solutions таҳлилчиларига таяниб ёзмоқда.

Бу миқдор катта тўртлик компаниялари — Sandbox, Decentraland, Cryptovoxels ва Somnium ҳисобига тўғри келади. Улардан ташқари ўнлаб компаниялар виртуал ерларни сотиш билан шуғулланади.

Тўртта платформада ҳар хил ўлчамдаги жами 268 минг 645 та ер участкаси мавжуд. 2021 йилнинг декабрь ойида 166 минг 464 та Sandbox ер участкалари сотилди. Бу учун эфир (Ethereum) криптовалютаси орқали 12 минг 700 доллар тўланган.

«Катта хатарлар мавжуд, аммо потенциал мукофотлар ҳам катта», — дейди виртуал кўчмас мулкка сармоя киритувчи Republic Realm компанияси бош директори Жанин Йорио.

Бундай кўчмас мулкка 16 миллион доллар сармоя киритган Tokens.com ўзининг метаоламида виртуал мода тадбирлари ва чакана савдо дўконларини ўтказишни режалаштирмоқда.

Қайд этилишича, сотувларнинг бирдан ўсишига Facebook ўзининг метаоламини ривожлантиришга эътибор қаратиш учун ребрендинг ўтказиши ва номини Meta’га ўзгартириши ҳақида эълон қилгани сабаб бўлган. MetaMetric маълумотларига кўра, ўшандан бери виртуал мулк сотуви ўтган йилнинг ноябрь ойидан бери деярли тўққиз баравар ўсиб, 133 миллион долларни ташкил этган.

2022 йилнинг январь ойидаги сотувлар, аллақачон, 85 миллион доллардан ошган.Таҳлилчиларнинг тахминига кўра, бундай тезликда сотувлар 2022 йил қарийб 1 миллиард долларга етиши мумкин. randEssence Market Researc маълумотларига кўра, метаолам кўчмас мулк бозори 2022 йилдан 2028 йилгача йилига 31 фоизга ўсади.

Шу билан бирга, баъзи экспертлар виртуал кўчмас мулк бозорини пирамида схемаси деб аташади. Одатдагидан фарқли ўлароқ, виртуал оламдаги кўчмас мулк код ёрдамида осонгина яратилади, шунинг учун уни жуда кўп миқдорда «қуриш» мумкин.

«Метаоламдаги ер савдоси одатда пирамида схемаси бўлиб, 20 йилдан ортиқ вақтдан бери мавжуд», дейди Индиана университети профессори Эдвард Кастронова.

Ёш истеъмолчилар метаолам ҳақида ижобий фикрда. Tokens.com бош директори Эндрю Кигуэлнинг тушунтиришича, рақамли нарсаларни қўлда ушлаб бўлмаса, уларнинг қийматини тушуниш қийин бўлган авлодлар бор.

«Ёш авлоднинг бу борада ҳеч қандай муаммоси йўқ. NFT билан бўлгани каби, блокчейн технологияси ҳам алмаштириб бўлмайдиган ва камёб нарсаларни қилиш имконини беради. Сиз уни сақлашингиз, оммага намойиш этишингиз ва сотишингиз мумкин», — дея хулоса қилди у.