Microsoft Россиядаги фаолиятини тугатиш учун 126 млн доллар сарфлайди
Айни дамда компаниянинг йиллик соф фойдаси 2 фоизга кўпайиб, 16,7 миллиард долларни ташкил этган.
Microsoft компаниянинг Россиядан чиқиб кетишини таъминлаш билан боғлиқ харажатларини 126 миллион долларга баҳолади. Бу ҳақда компаниянинг Қимматли қоғозлар ва бозорлар комиссияси (SEC) учун тайёрланган молиявий ҳисоботида айтилади.
Харажатлар қарзлар ва Россиядаги ходимларга ишдан бўшатиш нафақаларини тўлаш ҳамда активлар қадрсизланишидаги йўқотишларини қоплашни ўз ичига олади.
SEC томонидан эълон қилинган Microsoft ҳисоботига кўра, компаниянинг 2022 йил иккинчи чорагидаги даромади 51,8 млрд доллар ташкил қилган ва компания фойдаси 2021 йилнинг шу даврига нисбатан 12 фоизга ўсган. Йиллик соф фойда 2 фоизга кўпайиб, 16,7 миллиард долларга етган.
Microsoft 2022 йил март ойида Россияда ўз маҳсулот ва хизматларини сотишни тўхтатганини эълон қилди. Корпорация президенти Брэд Смитнинг таъкидлашича, бу қарор Россиянинг Украинага бостириб киришига жавобан жорий қилинган санкциялар билан боғлиқ.
«Биз АҚШ, Европа Иттифоқи ва Буюк Британия ҳукуматлари билан ҳамкорликда ишлаяпмиз ва бу давлатларнинг санкциялар тўғрисидаги қарорларига мувофиқ, Россиядаги бизнесимизнинг кўп қисмларини тўхтатяпмиз», — деган Брэд Смит.
Microsoft июнь ойи бошида компаниянинг Россиядаги бизнесига таъсир этувчи «иқтисодий истиқболлар ўзгариши» сабаб мамлакатдаги фаолиятини «сезиларли даражада» қисқартирмоқчи эканини маълум қилганди.
Компаниянинг қўшимча қилишича, Microsoft россиялик мижозларга нисбатан мавжуд шартнома мажбуриятларини бажаришда давом этади, бироқ янги савдолар тўхтатилади. Россиядаги фаолиятнинг қисқаришидан 400 дан ортиқ ходим зарар кўрди. Компания «ушбу оғир даврда» қўллаб-қувватлаш учун улар билан «яқин ҳамкорликда» ишлаётганини қайд этди.
Россия IP-манзилига эга фойдаланувчилар июнь ойининг ўрталарида Windows 10 ва 11 операцион тизимларини юклаб олаётганда муаммоларга дуч келди — уларни расмий веб-сайтдан фақат VPN орқали юклаб олиш мумкин эди. Июнь ойининг охирида Смит Microsoft Россиядаги бизнесни қисқартиришни ундан ҳеч нарса қолмагунча давом эттиришини айтди.
Аввалроқ Microsoft’нинг чораклик даромади кутилганидан 800 млн доллар юқори бўлгани хабар берилган эди. Маълум қилинишича, 25 январь куни АҚШда биржа савдолари якунлангандан сўнг Microsoft компанияси 2021 йилнинг охирги чорагидаги, яъни компаниянинг 2022 молиявий йилининг иккинчи чорагидаги фаолияти натижаларини тақдим этган.