Microsoft’нинг чораклик даромади кутилганидан 800 млн доллар юқори бўлди
Ҳисобот эълон қилингач Microsoft котировкалари биржадан ташқари савдода 8 фоизга ошди.
Microsoft компаниясининг чораклик даромади таҳлилчилар кутганидан 800 миллион доллар юқори бўлди. Бу ҳақда «Коммерсантъ» хабар берди.
Маълум қилинишича, 25 январь куни АҚШда биржа савдолари якунлангандан сўнг Microsoft компанияси 2021 йилнинг охирги чорагидаги, яъни компаниянинг 2022 молиявий йилининг иккинчи чорагидаги фаолияти натижаларини тақдим этган.
Қайд этилишича, умумий даромад 51,7 миллиард долларни ташкил этиб, 2020 йилнинг шу даврига нисбатан 20 фоизга ўсган. Соф даромад эса 18,8 миллиард долларни (+21 фоиз) ва акция донасига тушган даромад 2,48 долларни (+21 фоиз) ташкил этган. Компаниянинг натижалари таҳлилчиларнинг 50,9 миллиард доллар даромад олишини кутган прогнозларидан яхшироқ бўлган.
Умумий самарадорликнинг асосий омиллари даромади 46 фоизга ошган булутли хизматлар, шунингдек, Dynamics 365 (+45 фоиз) бизнес-иловалар линияси ва LinkedIn хизмати (+37 фоиз) бўлган. Компания молиявий йилнинг учинчи чораги (2021 йил 2-чораги тақвими) учун оптимистик прогнозни тақдим этган.
«Бизнинг бозордаги табақалаштирилган позициямиз, маҳсулотларимизга, шу жумладан булутли хизматларга фойдаланувчи талаби даромаднинг яна бир чоракда кучли ўсишини таъминлаши керак», дейилган компания хабарида.
Бозор иштирокчилари Microsoft компаниясининг молиявий ҳолатига қизиқиш билдирган — улар иқтисодиётнинг секинлашиши, инфляциянинг ўсиши ва «омикрон»нинг авж олиши пандемиянинг ўткир босқичида ўз позицияларини мустаҳкамлаган етакчи технология компаниялари фаолиятига таъсир қилишидан қўрққанди. Ижобий натижалар эълон қилинганидан сўнг, Microsoft котировкалари биржадан ташқари савдода 8 фоизга ошган.
Аввалроқ 2021 йилда Microsoft, Amazon ва Alphabet’нинг харидлари рекорд даражага етгани хабар қилинганди. Шунингдек, Microsoft қарийб 70 миллиард долларга Actvision Blizzard’ни сотиб олгани ҳақида хабар берилди.