Миллиардер Безоснинг космик кемаси учинчи марта сайёҳларни коинотга олиб чиқди
Кема бортида 6 нафар космик сайёҳ бўлган.
Миллиардер Жефф Безос томонидан асос солинган Blue Origin космик компанияси фуқаролардан иборат экипажни ракетада коинотга юборди. Шу тариқа, Blue Origin сайёҳлик парвозини учинчи марта амалга оширди.
New Shepard кемасида 6 нафар космик сайёҳ ер атмосфераси чеккасига йўл олди. Булар: собиқ футболчи ва телебошловчи Майкл Стрейхэ, биринчи америкалик астронавт Алан Шепарднинг тўнғич қизи Лора Шепард Черчли, Voyager Space Holdings раҳбари Дилан Тейлор, инвестор Эван Дик, Bess Ventures венчур капитал компанияси асосчиси Лейн Бесс ва унинг ўғли Кэмерон Бесс.
Парвозга отланганларнинг тўрт нафари космик сайёҳат учун пул тўлади, Майкл Стрейхэн ва Лора Шепард Черчли Blue Origin меҳмони бўлди.
Маълум бўлишича, New Shepard ракетаси АҚШнинг Техас штати ғарбидаги Blue Origin’нинг хусусий майдонида учирилган. Бир неча дақиқадан сўнг космик кема Ердан 100 километр баландликка кўтарилиб, «Карман» деб аталадиган чизиқ — Ер атмосфераси ва коинот ўртасидаги шартли чегарадан ўтган. Бу вақтда космик сайёҳлар бир неча дақиқа вазнсизликни бошдан ўтказиши мумкин.
Кейин саёҳатчилар билан капсула парашютлар ёрдамида Ерга автоном тушишни бошлаган ва Blue Origin учириш майдончаси яқинидаги чўлга қўнган. New Shepard ракетаси ҳам муваффақиятли қўнган ва ундан яна фойдаланиш мумкин. Бутун парвоз тахминан 10 дақиқа давом этган.
Маълумот ўрнида, 2021 йил бошидан буён Blue Origin коинотга 14 нафар сайёҳни юборди. Биринчи рейсда Жефф Безоснинг ўзи, унинг укаси Марк, собиқ учувчи Уолли Фанк, шунингдек, компаниянинг биринчи тижорат мижози 18 ёшли Оливер Дамен иштирок этди, чиптани унга отаси Somerset Capital Partners асосчиси совға қилган.
Октябрь ойида Безос компанияси иккинчи фуқаролик парвозини амалга ошириб, Blue Origin вице-президенти Одри Пауэрс, NASA собиқ муҳандиси Крис Бошуизен, тадбиркор Глен де Врис ва Стар Трекдаги капитан Кирк роли билан машҳур бўлган актёр Уилям Шатнерни жўнатди. Ҳаммаси бўлиб компания 100 миллион долларлик чипталарни сотишга муваффақ бўлган.
Аввалроқ NASA Жефф Безоснинг космик компанияси билан шартнома имзолагани ҳақида хабар берилганди.
