Миллиардер Ларри Пейж Alphabet’нинг 80 млн долларлик акцияларини сотди
Компания акциялари уларни бўлиш режалари эълон қилингандан сўнг 10 фоизга қимматлашганди.
Google асосчиларидан бири Ларри Пейж Alphabet’нинг 80 миллион долларлик акцияларини сотди. Бу ҳақда MarketWatch хабар берди.
Маълум қилинишича, Alphabet Inc. ҳаммуассиси ва бошқарув кенгаши аъзоси Ларри Пейж компаниянинг 80 миллион долларлик акцияларини сотган. Бир неча кун олдин компаниянинг қимматли қоғозлари чорак молиявий натижалари тўғрисидаги ҳисобот ва акцияларни бўлиш режалари ҳақидаги ҳисоботлар эълон қилинганидан сўнг 10 фоизга қимматлашганди.
Ларри Пейж 3 февраль куни очиқ бозорда C тоифасидаги 13 миллион 889 дона акцияни сотган. Бу тадбиркорга 40,56 миллион доллар маблағ келтирган. Маълумотларга кўра, акцияларнинг ўртача нархи 2920,53 долларни ташкил қилган.
Шунингдек, шу куннинг ўзида Ларри Пейж бозорга 13 миллион 889 дона А тоифали қимматли қоғозларни жойлаштирган ва компанияга қўшимча 40,64 миллион доллар даромад келтирган. Акцияларнинг ўртача нархи 2926,36 долларни ташкил этган.
Таъкидланишича, 2 февраль куни Alphabet Inc. 2021 йилнинг тўртинчи чораги учун молиявий ҳисоботларини эълон қилган. Чоракда компаниянинг даромади 75,33 миллиард долларга етиб, 2021 йилга нисбатан 32 фоизга ўсган. Шунингдек, Alphabet Inc. июльгача 20:1 шаклида акцияларни тақсимлашини эълон қилган.
Аввалроқ Alphabet’нинг шўъба корхонаси ўртача дастурчи даражасида код ёзадиган нейрон тармоғини яратгани хабар қилинганди. Шунингдек, Alphabet капиталлашуви акциялар бўлиниши ҳақидаги хабарлар фонида деярли 2 триллион долларга ошгани ҳақида хабар берилди.
