Жек Ма ўз вақтида инглиз тилидан дарс бериб ҳафтасига 15-20 доллар ишлаб топган. 2021 йилда эса Bloomberg унинг бойлигини 51,5 миллиард долларга баҳолади.

Ўқитувчидан миллиардер бизнесмен даражасига етиш йўлида Жек Мага тинимсиз меҳнат билан китоблар ҳамроҳ бўлгани аниқ. Қуйида Американинг Forbes журнали муқовасида расми чоп этилган биринчи хитойлик миллиардернинг севимли китоблари ҳақида сўз боради.

«Бизнес цикллари», Йозеф Шумпетер

Бу XX асрнинг энг нуфузли иқтисодчиларидан бири Йозеф Шумпетернинг асосий иқтисодий ишидир. Тадқиқотчи ўз китобида технологик инновациянинг тарихий ролига катта эътибор қаратган. Статистик ва тарихий маълумотлардан фойдаланиб, у бутун иқтисодий жараённи таҳлил қилишга интилган.

Шумпетер ўз ишида иқтисодиётнинг ҳолатини баҳолаш мумкин бўлган тебранишларни белгилаб берган. Ҳар бир бизнес циклида тўрт босқич мавжуд: чўққи, рецессия, қулаш, тикланиш — буларнинг барчаси енгиб ўтилгандан кейингина цикл тугалланган ҳисобланади. Ушбу усулга асосланиб, тадбиркорлар қачон битимлар тузиш ва активларни сотиш энг фойдали эканлигини кузатишлари мумкин.

«Абадиятга қурилганлар», Жим Коллинз, Жерри Поррас

Китоб Стэнфорд университетининг Олий бизнес мактаби томонидан олиб борилган тадқиқот натижасидир. Жим Коллинз бизнес маслаҳатчиси ва бошқарув соҳасидаги илмий материаллар муаллифидир. Бунга қадар ушбу ёзувчининг бошқа китоблар бир неча миллиардерлар томонидан эътироф этилгани ҳақида хабар берилганди.

Жумладан, миллиардер Жефф Безос Жим Коллинзнинг «Яхшидан зўргача» китобини ўқишга тавсия қилган. Бундан ташқари, Netflix асосчиси Рид Хастингс ушбу муаллифнинг «Тадбиркорликдан ташқари» номли китобини мақтаган.

«Абадиятга қурилганлар» китобининг ҳаммуаллифи Жерри Поррас ҳам Стэнфорд университети профессори ва ташкилий ўзгаришларни ташхислаш учун дастурий таъминот яратувчилардан бири. Улар 18 та компаниянинг — бошланғич корхоналардан тортиб йирик корпорацияларгача тажрибасини тўплаган ва бозорда ўз ўрнини шу қадар узоқ вақт сақлаб қолишга қандай амалиётлар ёрдам беради, деган саволга жавоб топди.

«Бу ерга ҳамма келади», Клэй Ширке

Бу америкалик медиа тадқиқотчиси Клей Ширкенинг 2008 йилда нашр этилган китобидир. Ширке ўз ишида Интернет ва ижтимоий тармоқларни замонавий институтлар деб ҳисоблайди, уларда жамоаларни яратишнинг анъанавий усуллари билан солиштирганда моҳиятан ҳеч қандай ташкилот назорат ва чекловлар мавжуд эмас.

Энди исталган вақтда тармоққа уланиш, контентни баҳам кўриш, уни яратиш ва ҳамфикрларни топиш мумкин. Ширкенинг ёзишича, энди одамлар телевизор кўриш ўрнига Twitter’да ўз фикрлари билан ўртоқлашади.

«Асосчилар», Крис Андерсон

Тадбиркор, 3D Robotics асосчиси, муаллиф ва Wired журналининг собиқ бош муҳаррири Крис Андерсоннинг «Асосчилар» китобида рақамли ишлаб чиқариш ривожига туртки бўлган учинчи саноат инқилоби ҳақида сўз боради.

Китобнинг асосида Андерсоннинг «Кейинги атом инқилоби: атомлар янги битлар бўлади» туради. Кейинчалик унинг ғоялари Harvard Business Review журналининг мақоласида келтирилди.

«Дао Дэ Цзин», Лао-Цзи

Хитой ҳикматларининг тўпламини милоддан аввалги VI—V асрларда яшаган қадимги файласуф Лао-Цзи ёзган. «Дао Дэ Цзин» «Йўл китоби» деб ҳам аталади. У 81 та қисқа бобдан иборат бўлиб, унда кучли руҳни тарбиялаш, уйғунликка эришиш ва ҳаёт қийинчиликларини енгиш йўллари ёзилган.

Китоб ғоялари замирида «Дао» тушунчаси: оламнинг асосий тамойиллари ётади, бу эса нарсаларнинг табиий тартиби ва «самовий ирода» мавжудлигини назарда тутади. Лао-Цзи таърифлаган ҳамма нарса ҳаётнинг барча соҳаларига тегишли: бизнес, шахсий ҳаёт ва ҳатто экология.

Бизнесга оид янгиликлар телеграм каналимизда @kommersuz