АҚШ Миллий аэронавтика ва фазони тадқиқ қилиш бошқармаси (NASA) астронавтларнинг Ойга учирилишини 2025 йилгача қолдирди. Бу ҳақда NASA маъмури Билл Нелсон телефон орқали ўтказилган матбуот анжуманида маълум қилди.

NASAнинг ушбу лойиҳаси «Артемида» номи билан танилганди. Бу Space Launch Systems ракетаси ва Orion капсуласидан фойдаланган ҳолда амалга ошириладиган бир қатор миссиялардан иборат. «Артемида I» миссиясини астронавтлар иштирокисиз Ой орбитасига олиб чиқиш 2021 йил бошига режалаштирилган эди. Бироқ жарайён 2022 йил баҳоридан олдин амалга оширилади.

Нелсоннинг сўзларига кўра, экипаж билан «Артемис II» миссияси 2024 йилнинг май ойига режалаштирилган. Космонавтларнинг Ой юзасига қўнишидан иборат «Артемис III» миссияси эса 2025 йилдан эрта бажарилмайди.

Унинг сўзларига кўра, АҚШнинг собиқ президенти Дональд Трамп маъмурияти томонидан 2024 йилда Ойга одам қўндириш мақсади техник имкониятлар жиҳатидан оқланмаган. Трамп президентлигидан олдин фақат 2028 йилда Ойга одам қўндирилиши режалаштирилган эди.

Аввалроқ Rolls-Royce кичик ядровий реакторлар ишлаб чиқариш учун 600 миллион доллардан ортиқ маблағ тўплагани ҳақида хабар берилганди.