NATO бош котиби Норвегия марказий банкини бошқаради
Йенс Столтенберг 1 декабрда янги лавозимга киришиши кутилмоқда.
NATO бош котиби Йенс Столтенберг Норвегия Марказий банки раҳбари этиб тайинланди. Бу ҳақда Норвегия ҳукумати веб-сайтида баёнот эълон қилинди.
«Норвегияда камдан-кам одам эга бўлган молиявий маълумот, жамиятни тушуниш ва бошқарув тажрибасининг мужассамлиги [Столтенберг]ни барчамиз номидан муҳим ижтимоий муаммоларни ҳал қилувчи институт — Норвегия банки раҳбари лавозимига жуда мос келади», — деган Норвегия молия вазири Трюгве Слагсволд Ведум.
Қайд этилишича, Норвегия Марказий банкининг амалдаги раҳбари Эйстейн Олсен 1 март куни ўз лавозимини тарк этади, бироқ Столтенберг Шимолий Атлантика альянси раҳбари сифатидаги фаолиятини якунлаганидан кейингина бу лавозимни эгаллаши мумкин бўлади. Унинг ваколати 2022 йил 30 сентябрда тугайди.
Муваққат раҳбарликка Олсеннинг ўринбосари Ида Уолден Бах ўтади. Столтенберг 1 декабрда янги лавозимга киришиши кутилмоқда. Унинг ўрнига NATO бош котиби сифатида ким тайинланиши ҳозирча маълум қилинмаган.
Маълумот ўрнида, 62 ёшли Столтенберг 1987 йилда Осло университетининг иқтисод факультетини тамомлаган. Норвегия ишчилар партиясини бошқарган, икки марта Норвегия Бош вазири лавозимларида ишлаган, молия вазири, шунингдек, савдо ва энергетика вазири бўлган. 2014 йилда Столтенберг NATO бош котиби этиб тайинланган эди.
