Навоий давлат кончилик ва технологиялар университети ташкил этилди
Университетнинг юқори курс талабалари иш ҳақи тўланадиган тизим орқали банд қилинади.
Ўзбекистонда Президент қарори билан Навоий давлат кончилик ва технологиялар университети ташкил этилди. Бу ҳақда Адлия вазирлигининг Huquqiy axborot канали хабар берди.
Маълум қилинишича, «Навоий давлат кончилик ва технологиялар университетини ташкил этиш тўғрисида»ги Президент қарори қабул қилинди. Қарор билан Навоий давлат кончилик институти Навоий давлат кончилик ва технологиялар университети этиб қайта ташкил этилди.
Университетда саноат, техника-технология, муҳандислик соҳалари учун олий маълумотли мутахассислар ва илмий-педагогик кадрлар тайёрланади. Қарорга кўра, Университет ҳузурида қуйидагилар ташкил этилди:
- Нукус кончилик институти;
- «Навоий» илмий-технология саноат парки;
- 2022/2023 ўқув йилида Кармана политехника техникуми ва Ғозғон политехника техникуми.
Қайд этилишича, университет ҳузуридаги техникумларда саноат, кончилик, металлургия, машинасозлик, қурилиш, энергетика, электротехника, хизмат кўрсатиш йўналишларида кадрлар тайёрлаш йўлга қўйилади.
Университет юқори курс талабалари иш ҳақи тўланадиган тизим орқали банд қилинади, жумладан амалиёт ўташда ҳақ тўлаш тизимини жорий этиш чоралари кўрилади.
Таъкидланишича, университетда 2023/2024 ўқув йилидан техника йўналиши бўйича қўшма таълим дастурлари асосида кадрлар тайёрлаш йўлга қўйилади.
Аввалроқ Ўзбекистондаги 4 та университет Британиянинг THE рейтингига киргани хабар қилинганди. Шунингдек, Ўзбекистонда Халқаро қишлоқ хўжалиги университети ташкил этилиши ҳақида хабар берилди.