Миллиардер Руперт Мердокнинг News Corp (New York Post ва WSJ) медиаҳолдинги киберҳужумга учради. Бу ҳақда компания ўз баёнотида маълум қилди.

Нашр қилинган ҳужжатларда муаммо январь ойида аниқлангани ва хизматлари News Corp учинчи томон компанияси томонидан тақдим этилган булутли тизимлардан бирининг ишлаши билан боғлиқлиги кўрсатилган (компания номи ошкор қилинмаган).

«Ушбу тизимлардан бири доимий киберҳужумлар нишонига айланган», дейилади ҳужжатда.

Ҳужжатларда компания ҳужумнинг маълум бир хорижий ҳукумат билан алоқаси борлигига ишора қилган, шунингдек, маълумотлар сизиб чиқиши ҳақида хабар берган. Медиаҳолдинг ҳодиса оқибатларини бартараф этиш учун зарур бўладиган харажатларни ҳозирча ҳисоблаб бера олмаслигини маълум қилди.

Корпорация таркибига кирувчи The Wall Street Journal манбасига кўра, киберҳужум 20 январь куни содир бўлган. Бу медиаҳолдингнинг нашрлари ва бизнес бўлинмаларига, жумладан WSJ’нинг ўзи, Dow Jones агентлиги, New York Post газетаси ва News Corp бош қароргоҳига таъсир кўрсатган.

News Corp бузғунчиликни аниқлаганидан сўнг, ҳуқуқни муҳофаза қилиш органлари билан боғланиб, Mandiant киберхавфсизлик компаниясини тергов учун жалб қилди.

«Ҳужумнинг мақсади, эҳтимол, Хитой манфаатлари учун разведка маълумотларини йиғиш эди», — Mandiat вице-президенти Дэвид Вонг.

WSJ манбаларига кўра, бузғунчилик оқибатида хакерлар компаниянинг ўнлаб ходимлари, жумладан, журналистларнинг электрон почталари ва ҳужжатларига кириш ҳуқуқига эга бўлди: Google хизматларидаги ҳужжатлар, жумладан, қоралама мақолалар ҳужумчилар қўлида бўлган.

«Молиявий маълумотлар ва мижозлар маълумотларини ўз ичига олган тизимларга таъсир қилинмаган», — деди Вонг.

Нашрда ҳужумчилар бузғунчиликни айнан қандай амалга оширгани ва қанча ходим зарар кўргани ҳақида батафсил маълумот йўқ. Шу билан бирга, WSJ манбаларига кўра, тергов ҳакерлар тизимга 2020 йил февраль ойида кирганини кўрсатган.