Никель нархи Донбассдаги кескинлашув туфайли 11 йилликдаги рекорд даражага етди
Лондон металл биржасида никель фючерслари 2,92 фоизга ўсди.
Никель нархи Донбассдаги кескинлашув фонида 2011 йилдан бери энг юқори кўрсаткичга етди. Бу ҳақда Bloomberg хабар берди.
Маълум қилинишича, никель нархи 2011 йилдан бери биринчи марта бир тоннаси учун 25 минг доллардан ошган. Лондон металл биржасида (LME) никель фючерслари 2,92 фоизга ўсган. Никель нархи ўсишда давом этмоқда.
Қайд этилишича, металл нархининг кўтарилишига жаҳон захираларининг камайиши ва Украинадаги кескинлик туфайли асосий ишлаб чиқарувчи бўлган Россия томонидан таъминотнинг тўхтатилиши мумкинлиги сабаб бўлмоқда.
Никель 2022 йил Лондон биржасида нархларнинг ўсиши бўйича етакчилар қаторидан жой олди. У электромобилларга аккумуляторлар ишлаб чиқариш учун никелга бўлган эҳтиёж ортиб бораётгани сабабли талабнинг таклифдан юқори бўлиши ҳақидаги бир қатор прогнозлар туфайли қимматлаша бошлаган.
«Сўнгги воқеалар, айниқса, захиралар жуда паст даражада бўлган ҳолда, таъминот хавфини айниқса юқори қилади», — деган TD Securities товар стратеги Райан Маккей.
Таъкидланишича, Лондон биржасида никель захиралари 2019 йилдан бери энг паст даражага тушган.
Аввалроқ Олтин нархи июнь ойидан бери энг юқори кўрсаткичга етгани хабар қилинганди. Шунингдек, Brent маркали нефть нархи 2014 йилдан бери илк бор 100 долларга яқинлашгани ҳақида хабар берилди.
