Коронавируснинг янги штамми — «омикрон» аниқланганидан кейин инвесторлар Осиё компанияларидаги акцияларидан қутула бошлади. Бу ҳақда Bloomberg ёзмоқда.

Қайд этилишича, Осиё фонд индекси MSCI AC Asean Index коронавируснинг янги штамми аниқланганидан буён 4 фоиздан кўпроққа тушган. Вазият Лотин Америкаси ва Европа фонд бозорига қараганда ёмонроқ.

Инвесторлар Осиё бозорини тарк этиш орқали ўзларини суғурта қилмоқда, чунки Осиё бозори коронавируснинг олдинги версияси — «дельта»дан энг кўп зарар кўрган. Ўшанда «дельта»расмий рўйхатга олинганидан кейин икки ой ичида Жануби-Шарқий Осиё корхоналари акциялари қиймати деярли 7 фоизга тушиб кетган эди.

Агентликка кўра, ёзда Осиёда «дельта» штаммининг пайдо бўлиши ва минтақада COVID-19’га қарши эмлашнинг паст кўрсаткичлари туфайли пандемия янги куч билан бошланган.

«Осиё бозорларига Хитой иқтисодининг ўсиш суръати секинлашиши, шунингдек, АҚШ Федерал резерв тизими асосий ставкасини кутилганидан эртароқ ошириши ҳақидаги қўрқувлар босим қилмоқда», дея ёзади Bloomberg.

Осиёнинг JPMorgan Private Bank инвестиция стратегияси раҳбари Александр Вольфнинг сўзларига кўра, «омикрон» саёҳат ва ўрнатилган чекловларга боғлиқ бўлган иқтисодий тикланишни янада кечиктириш мумкин.

BNP Paribas Asset Management компаниясининг Осиёдаги қимматли қоғозлар бўлими раҳбари Чжикай Ченнинг таъкидлашича, янги штаммнинг пайдо бўлиши Осиё бозорларини конструктив кўриб чиқиш учун хавф туғдиради.

Маълумот учун, «омикрон» штамми илк бор Жанубий Африка Республикасида аниқланди. Шундан сўнг бир қанча давлатлар, жумладан, Қозоғистон, Исроил ва Россия янги штамм аниқланган давлатлардан киришни чеклади.

JPMorgan стратеглари прогнозларига кўра, коронавируснинг янги варианти жаҳон фонд бозоридаги ўсишни тўхтата олмайди.

«Биз 2022 йилда коронавирусдан кейинги нормаллашув глобал миқёсда давом этишини кутамиз», — дейди улар.

Аввалроқ Хитойнинг инвестиция ҳамда «очиқ эшиклар» сиёсатига бағишланган мақола эълон қилинганди.