Оқ уйда Украина бўйича брифинг ўтказилганидан сўнг АҚШ қимматли қоғозлари бозори «қулади». Бу ҳақда «Коммерсантъ» хабар берди.

Маълум қилинишича, Нью-Йорк фонд биржасида АҚШнинг асосий индекслари 1,4–2,8 фоизга пасайган. Маълумотларга кўра, беқарорлик АҚШ Президенти маслаҳатчиси Жейк Салливаннинг нутқидан сўнг бошланган. У америкаликларни Украинани зудлик билан тарк этишга чақирган ва Олимпиада вақтида Россиянинг бостириб кириши хавфи борлигини маълум қилган.

Қайд этилишича, асосий Америка индексларининг қийматлари қуйидагича кўриниш олган:

• Dow Jones — 34 минг 738,06 пункт (-1,43 фоизга қисқарган);
• S&P 500 — 4418,64 пункт (-1,9 фоизга қисқарган);
• NASDAQ — 13 минг 791,15 пункт (-2,78 фоизга қисқарган).

Таъкидланишича, Салливан америкаликларни уруш хавфи туфайли 24–48 соат ичида Украинани тарк этишга чақирган. Шу билан бирга, Вашингтон Москва ҳужум қилишга қарор қилганми ёки йўқлигини ҳақида маълумотга эга эмас. Россия Ташқи ишлар вазирлиги Оқ уй баёнотларини ваҳима кўтариш деб атаган.

Аввалроқ АҚШда январь ойидаги инфляция 40 йиллик рекордни янгилагани хабар қилинганди. Шунингдек, АҚШда ишсизлик даражаси январь ойида 4 фоизга ошгани ҳақида хабар берилди.