Ўзбекистон «Ҳукумат суд қарорисиз ва адолатли товон пулисиз мулкни мусодара қилмаслик» рейтингида 139 та давлат ичида 138 ўринда турибди. Бу ҳақда Олий Мажлис Қонунчилик палатаси депутати Расул Кушербоев маълум қилди.

Депутатларга тақдим этилган маълумотларга кўра, Жаҳон одил судлов лойиҳаси халқаро ноҳукумат ташкилоти томонидан юритиладиган «Ҳуқуқ устуворлиги» индексининг «Қонунларга риоя қилиш» индикаторининг «Ҳукумат суд қарорисиз ва адолатли товон пулисиз мулкни мусодара қилмаслиги субиндикаторида (2021 йил ҳисоботида) Ўзбекистон максимал 1 баллдан 0,25 балл билан 139 та мамлакат ичида 138-ўринни эгаллаган.

«Хусусий мулк дахлсизлиги бўйича халқаро ҳамжамиятда Ўзбекистоннинг мана шу кулгули  аҳволга тушишига ҳисса қўшган барча амалдорларга ‘рахмат’», — деб ёзади депутат.

Маълумот учун, 2021 йилнинг 11 ойи давомида ер участкаларининг ўзбошимчалик билан эгаллаб олиниши ва ушбу ер участкаларида ўзбошимчалик билан иморат қурилишига оид 15 минг 416 та (2496,5 гектар) қонун бузилиши ҳолатлари аниқланган.

Аввалроқ Ўзбекистонда кўп қаватли уйлар қурилиши бўйича 47 та мансабдор шахсга нисбатан чора кўрилиши маълум бўлганди.