Ўзбекистон ОТБдан ичимлик ва оқова сув тизимларини қуриш ва реконструкция қилиш учун 161 млн доллар қарз олди
ОТБ Ўзбекистонга ичимлик ва оқова сув тизимларини қуриш ва реконструкция қилиш учун 161 млн доллар қарз беради. Маблағ Тошкент вилоятининг айрим ҳудудлари учун сарфланади.
Ўзбекистон Осиё тараққиёт банкидан ичимлик ва оқова сув тизимларини қуриш ва реконструкция қилиш учун 161 миллион доллар қарз олди. Бу ҳақда Norma хабар берди.
Маълум бўлишича, 2 август куни Президентнинг «Осиё тараққиёт банки иштирокида ‘Тошкент вилояти шаҳар ва туманларида ичимлик ва оқова сув тизимларини қуриш ва реконструкция қилиш (3-босқич)’ лойиҳасини амалга ошириш чора-тадбирлари тўғрисида»ги қарори қабул қилинган.
Ҳужжат Тошкент вилоятининг Ангрен, Бекобод, Олмалиқ, Оҳангарон, Чирчиқ ва Янгийўл шаҳарларида ҳамда Чиноз тумани марказида аҳоли ва тадбиркорлик субъектларининг ичимлик ва оқова сув хизматлари билан таъминланганлик даражасини ошириш, ушбу ҳудудларнинг санитария-эпидемиологик ҳамда экологик ҳолатини янада яхшилаш, шунингдек, Осиё тараққиёт банки билан ҳамкорликни янада кенгайтириш мақсадида қабул қилинган.
Унга мувофиқ, Ўзбекистон ва ОТБ ўртасида «Тошкент вилояти шаҳар ва туманларида ичимлик ва оқова сув тизимларини қуриш ва реконструкция қилиш (3-босқич)» лойиҳасини амалга ошириш учун 5 йиллик имтиёзли даврни ўз ичига олган 25 йилда қайтариш шарти билан 161 миллион доллар миқдоридаги қарз битими имзоланган.
Лойиҳанинг умумий қиймати 185,8 миллион долларни ташкил этади, шу жумладан:
- ОТБ қарзи — 161 миллион доллар;
- Лойиҳани амалга оширишда Ўзбекистоннинг қўшилган қиймат солиғини қоплаш ва божхона имтиёзлари шаклида улуши — 24,8 миллион доллар;
Қайд этилишича, лойиҳани амалга ошириш даври 5 йилни (2022 – 2027 йиллар) ташкил этади. «Ўзсувтаъминот» акциядорлик жамияти лойиҳанинг ўз вақтида ва сифатли амалга оширилиши учун зарур ташкилий-техник тадбирларнинг ўз вақтида ўтказилишини, ОТБ қарзидан мақсадли ва самарали фойдаланилишини таъминлайдиган масъул ижро этувчи орган этиб белгиланган.
Тошкент вилояти ҳокимлиги «Ўзсувтаъминот» АЖ билан биргаликда лойиҳанинг сифатли амалга оширилиши, белгиланган кўрсаткичларга эришилиши ва ОТБ қарзи қайтарилиши учун жавобгар қилиб белгиланган.
Шунингдек, ҳужжат билан қуйидагилар тасдиқланган:
- «Тошкент вилояти шаҳар ва туманларида ичимлик ва оқова сув тизимларини қуриш ва реконструкция қилиш (3-босқич)» лойиҳасини техник-иқтисодий асослашнинг асосий техник-иқтисодий параметрлари;
- Лойиҳа доирасида Осиё тараққиёт банки қарзини қайтариш, фоизлар ва воситачилик ҳақини тўлашнинг прогноз жадвали;
- Лойиҳа доирасида Осиё тараққиёт банки қарзига хизмат кўрсатиш харажатларини қоплаш бўйича улушлар тақсимотининг прогнози;
- «Тошкент сув таъминоти» масъулияти чекланган жамиятини молиявий соғломлаштириш бўйича «Йўл харитаси».
Ҳужжат Қонун ҳужжатлари маълумотлари миллий базасида эълон қилинган ва 03 августдан кучга кирган.
Аввалроқ Ўзбекистоннинг ташқи қарзи қанчага етгани очиқланганди. Унга кўра, Ўзбекистоннинг умумий ташқи қарзи 2022 йил бошига нисбатан 16 фоизга ёки 5,4 млрд. долларга ошиб, 2022 йил 1 январь ҳолатига 39,6 миллиард долларни (2021 йилнинг 1 январь ҳолатига 34,2 миллиард доллар) ташкил қилган.
Хусусан, 2021 йил бошига нисбатан давлат ташқи қарзи 11 фоизга ёки 2,4 миллиард долларга ўсиб 23,7 миллиард долларни, давлат томонидан кафолатланмаган ташқи қарз эса 24 фоизга ёки 3 миллиард долларга ўсиб 15,8 млрд. долларни ташкил этган.