Ўзбекистон Россия алкоголини энг кўп харид қилувчилар қаторида: импорт қарийб 1 млн долларга етди
Мамлакат 2021 йил ташқи бозорларга 2,7 миллион декалитрдан ортиқ кучли алкоголли ичимликлар етказиб берган.
Ўзбекистон Россия алкоголь маҳсулотларини импорт қилувчи етакчи давлатлар қаторига кирди. Бу ҳақда Россия Қишлоқ хўжалиги вазирлиги ҳузуридаги Агросаноат маҳсулотлари экспортини ривожлантириш федерал маркази хабар берди.
Қайд этилишича, Ўзбекистон 2021 йил Россиядан алкоголь импортини 2,7 баробарга ошириб, 999 минг долларга етказган.
Маълум қилинишича, Россия 2021 йил ташқи бозорларга 2,7 миллион декалитрдан ортиқ кучли алкоголли ичимликлар етказиб берган. Бу 2020 йилнинг шу даврига нисбатан 12 фоизга кўпдир. Экспортдан тушган тушум 20 фоизга ошиб, 195 миллион долларни ташкил этган.
Експорт ҳажмининг асосий қисми анъанавий тарзда ароққа тўғри келган, унинг савдоси 5,6 фоизга ошиб, жисмоний кўрсаткичда 2,3 миллион декалитрни, пул ифодасида эса 12 фоизга ошиб, 160 миллион долларни ташкил этган.
Ўтган йили Россия 75дан ортиқ мамлакатларга кучли спиртли ичимликларни экспорт қилган. 2020 йилда бўлгани каби, энг йирик харидорлар Европа давлатлари — Латвия, Буюк Британия ва Германия бўлди. Ўтган йили Латвияга етказиб бериш ҳажми 51 фоизга ошиб, 260 минг декалитрни, пул ифодасида эса 69 фоизга ошиб, 32 миллион долларни ташкил этган.
Буюк Британия харидларни 30 миллион долларга (-11 фоиз) камайтирган, Германия уни 26 миллион долларга (+16 фоиз) оширган. Россиядан кучли алкоголли ичимликлар импорт қилувчи бешталик қаторига Украина (22 миллион доллар, 27 фоиз ўсиш) ва Қозоғистон (14 миллион доллар, 74 фоиз ўсиш) ҳам кирган.
Бундан ташқари, Хитой (+66 фоиз — 9,1 млн доллар), Озарбайжон (+62 фоиз — 3,1 млн доллар), Грузия (+32 фоиз — 2,5 млн доллар), Веьтнам (3,1 баробар — 1,1 млн доллар), Венгрия (+62 фоиз — 1,1 миллион долларга) ва Ўзбекистон (2,7 баробар — 999 минг долларгача) Россиядан алкоголь импортини сезиларли даражада оширган.