Ўзбекистон таълим муассасаларида чет тилларини ўргатиш учун 15 миллиард сўм ажратилади. Бу ҳақда Norma хабар берди.

Маълум қилинишича, Вазирлар Маҳкамасининг 19 январдаги «Чет тилларни ўрганишни такомиллаштиришга доир қўшимча чора-тадбирлар тўғрисида»ги қарори қабул қилинган.

Қарор билан халқ таълими соҳасидаги ислоҳотларни қўллаб-қувватлаш жамғармасига ажратиладиган маблағлар ҳисобидан Чет тилларни ўрганишни қўллаб-қувватлаш жамғармасига бюджетдан ташқари 15 миллиард сўм миқдорида бир марталик моддий ёрдам ажратилиши назарда тутилмоқда.

Давлат бюджетидан жамғармага ажратиладиган маблағлар қуйидагиларга йўналтирилади:

• мактабгача таълим муассасалари, умумтаълим мактаблари, академик лицейлар, олий таълим муассасалари ва ўқув марказларида самарали ўқитиш услублари, дастурлари ва дарсликларини жорий этиш;
• хорижий мамлакатларда нашр этилган замонавий ўқув ва илмий адабиётлар, дарсликлар ва ўқув-методик қўлланмалар, халқаро тест синовлари ва уларни ўтказиш учун тегишли рухсат ва лицензиялар, чет тилларини ўқитиш мазмунига муаллифлик ҳуқуқини сотиб олиш;
• хорижий тилларни ўрганишга кўмаклашиш соҳасида ахборот-коммуникация технологиялари, дастурий лойиҳаларни ишлаб чиқиш ва амалга ошириш;
• асосий тил кўникмаларини шакллантириш учун видеолар, ўйинлар, кўнгилочар, фильмлар ва бошқа таълим контентини яратиш;
• фуқаролик-ҳуқуқий шартномалар асосида юқори малакали, шу жумладан маҳаллий ва хорижий мутахассисларни жалб этиш ва бошқалар.

Бундан ташқари, 2022 йил 1 февралдан камида C1 ёки ундан юқори даражадаги халқаро миқёсда тан олинган миллий ёки унга тенглаштирилган сертификатга эга ҳамда рус тилида сўзлашмайдиган таълим муассасаларида (синфларида) ишлаётган рус тили ўқитувчиларига иш ҳақига 50 фоиз қўшимча тўланади.

Бунда «Test of Russian Foreign Language» (ТORFL)нинг C1 даражасидаги халқаро сертификат, «Рус тилидан чет тили сифатидаги тест»дан ТРКИ3 даражасидаги халқаро сертификат, шунингдек, ўзаро мос келувчи C1 «тилидан чет тили сифатидаги тест» халқаро сертификатлари ҳамда «The Common European Framework of Reference for Languages» C1 даражадаги сертификат ҳисобга олинади.

Таъкидланишича, 2022 йил 1 мартдан бошлаб малакали мутахассисларни жалб қилган ҳолда чет тили ўқитувчиларининг ўқиш, ёзиш ва нутқ сўзлаш бўйича компетенцияларини ривожлантириш ҳамда сертификат олишга қаратилган малака ошириш курслари ташкил этилади.

Вазирлар Маҳкамаси ҳузуридаги Таълим сифатини назорат қилиш давлат инспекциясига 2022 йил 1 майга қадар халқаро миқёсда эътироф этилган баҳолаш ташкилотлари билан ҳамкорликда чет тиллари ўқитувчиларининг тинглаш, ўқиш, ёзиш ва сўзлаш бўйича малака тестларида тинглаш, ўқиш, ёзиш ва сўзлаш малакасини баҳолаш тизимини ишлаб чиқиш топширилган.

Ҳужжат қонун ҳужжатлари маълумотлари миллий базасида давлат тилида эълон қилинган ва 2022 йил 20 январдан кучга кирган.

Аввалроқ Ўзбекистонда ёш тадбиркорларни қўллаб-қувватлаш учун 10 миллиард сўмгача грант ажратилиши хабар қилинганди. Шунингдек, Ўзбекистонда аҳолини камбағалликдан чиқариш учун 10 триллион сўм имтиёзли кредит ажратилиши ҳақида хабар берилди.