«Ўзбекистон темир йўллари» талабалар учун байрам чегирмалари юзасидан изоҳ берди. Бу ҳақда компания матбуот хизмати хабар берди.

Маълум қилинишича, Президентнинг 2021 йил 20 декабрдаги «2022 йилда расмий саналарни нишонлаш даврида қўшимча ишланмайдиган кунларни белгилаш ва дам олиш кунларини кўчириш тўғрисида»ги фармонига мувофиқ республикада ички йўналишлардаги йўловчи поездлари тарифидан киритилган чегирмалар тўғрисидаги эълонга талабалар томонидан саволлар келиб тушмоқда.

Таъкидланишича, Ўзбекистон олий ва ўрта-махсус таълим муассасалари талабалари учун имтиёзлар Ўзбекистон Президентининг 1992 йил 22 декабрдаги «Ўзбекистон Республикаси ўқувчилари ва талабаларининг йиллик қишки таътиллари тўғрисида»ги қарорига мувофиқ ҳар йили 28 декабрдан 10 январга қадар белгиланади. Ҳужжатда қайд этилишича, қишки таътил даврида кундузги бўлимларнинг талабалари ва ўқувчиларига йўл ҳақи 50 фоизли чегирма билан сотилади.

Шу кунларда эълон қилинган, яъни 2021 йил 31 декабрдан 2022 йил 4 январгача бўлган даврдагига чиптанинг тариф қисмидан 15 фоизли чегиртма Ўзбекистон олий ва ўрта-махсус таълим муассасаларининг қолган бошқа таълим бўлимлари (сиртқи, кечки ва магистратура) талаба ва ўқувчиларига нисбатан қўлланилади.

Маълумот ўрнида, имтиёзли бўлган чипталарни фақат темир йўл кассаларида харид қилиш мумкин. Электрон чипталарда белгиланган чегирмалар расмийлаштирилмайди. Қўшимча маълумотларни Тошкент шаҳридаги 1005 қисқа телефон рақами, жойлардаги темир йўл кассалари ҳамда маълумотлар бюросидан билиб олиш мумкин.

Аввалроқ Ўзбекистонда темир йўллардан йилда бир марта бепул фойдаланиш ҳуқуқи кимларга берилиши хабар қилинганди.