Ўзбекистон Бош вазири ўринбосари – инвестициялар ва ташқи савдо вазири Сардор Умурзоқов Истанбулда Қирғизистон иқтисодиёт ва савдо вазири Данияр Амангелдиев билан учрашди. Бу ҳақда вазирлик матбуот хизмати хабар берди.

Маълум қилинишича, учрашувда инвестициявий, савдо-иқтисодий, транспорт ва логистика ҳамкорлигини чуқурлаштириш масалалари муҳокама қилинган. Шунингдек, чорвачилик, енгил саноат, кимё, фармацевтика ва озиқ-овқат соҳасида қиймати 60 миллион доллардан зиёд бўлган 550 лойиҳани ўз ичига олган саноат кооперациясини ривожлантириш бўйича «Йўл харитаси»нинг ижро этилиши муҳокама қилинган.

Таъкидланишича, Ўзбекистон-Қирғизистон савдо айланмасида сезиларли ўсиш кузатилган. Жумладан, ўтган 4 йил мобайнида ўзаро савдо ҳажми 5 баравардан зиёд ошган ҳамда пандемия ва инқироздан кейинги даврда ижобий динамикани сақлаб қолган.

Шу билан бирга, томонлар икки мамлакат иқтисодиётларининг юксак салоҳиятини қайд этиб, товар айирбошлашни диверсификация қилиш ҳамда яқин келажакда унинг ҳажмини 2 миллиард долларга етказишга доир қўшма чора-тадбирларни муҳокама қилган. Бу борада енгил саноат, озиқ-овқат, электротехника, металлургия, нефть-кимё саноати, шунингдек, қурилиш материаллари ишлаб чиқариш тармоқлари истиқболга эга соҳалар ҳисобланади.

Қайд этилишича, транспорт ва логистика йўналишидаги ҳамкорлик масалаларига ҳам тўхталиб ўтилган. Жумладан, икки давлатни боғловчи транспорт инфратузилмасини модернизация қилиш ва кенгайтириш билан боғлиқ қатор лойиҳалар, шунингдек, мультимодал етказиб бериш занжирлари учун тариф ва нотариф шарт-шароитларни яхшилаш бўйича навбатдаги тадбирлар муҳокама қилинган. Ушбу чоралар мажмуи ўзаро юк ташиш ҳажмини сезиларли даражада оширишга имкон беради.

Шунингдек, томонлар минтақалараро ҳамкорликни изчил ривожлантиришга алоҳида эътибор қаратган. Хусусан, 2021 йилда Наманган ва Жалолободда бўлиб ўтган икки томонлама бизнес-форумлар натижалари кўриб чиқилган. 2022 йилнинг биринчи чорагида иккала мамлакатнинг чегараолди ҳудудлар раҳбарлари Кенгашининг навбатдаги йиғилишини ўтказиш имкониятлари кўриб чиқилган.

Аввалроқ Ўзбек-қирғиз тараққиёт жамғармасини ташкил этиш тўғрисидаги битим тасдиқлангани хабар қилинганди.