Ўзбекистонда 10 ойда қанча инвестиция ўзлаштирилгани маълум бўлди
Умумий қиймати 75,5 трлн сўм бўлган 10 минг 112 та инвестиция лойиҳаси ишга туширилган
Ўзбекистон бош вазири ўринбосари Сардор Умурзоқов раҳбарлигида 6 ноябрь куни видеоконференция шаклида Ташқи савдо, инвестициялар, маҳаллий саноатни ривожлантириш ва техник жиҳатдан тартибга солиш масалалари бўйича ҳукумат комиссиясининг йиғилиши ўтказилди. Бу ҳақда Инвестициялар ва ташқи савдо вазирлиги матбуот хизмати хабар берди.
Маълум қилинишича, йиғилишда инвестициявий ва ташқи савдо фаолиятининг жорий кўрсаткичлари, шунингдек, инвестицияларни жалб этишни янада рағбатлантириш, саноатни ривожлантириш ва экспорт салоҳиятини ошириш чора-тадбирлари муҳокама қилинган.
Қайд этилишича, йиғилишда вазирликлар, идоралар, тармоқ бирлашмалари, тижорат банклари, маҳаллий ҳокимият органлари, шунингдек, Ўзбекистоннинг хориждаги дипломатик ваколатхоналари раҳбарлари иштирок этган.
Шу билан бирга, тармоқлар ва ҳудудлар кесимида инвестиция дастурларини амалга ошириш ва инвестиция лойиҳаларининг жорий этилиши кўриб чиқилган. 2021 йилнинг дастлабки 10 ойида 6,8 миллиард долларлик тўғридан-тўғри хорижий инвестициялар ўзлаштирилгани маълум қилинди. Умумий қиймати 75,5 триллион сўм бўлган 10 минг 112 та инвестиция лойиҳаси ишга туширилган ва натижада 142,8 мингта янги иш ўринлари яратилган.
Хабарга кўра, йил охиригача яна 3145 та янги инвестиция лойиҳасини фойдаланишга топшириш ҳамда жалб этилган тўғридан-тўғри хорижий инвестициялар миқдорини 8,1 миллиард долларга етказиш режалаштирилган. Ушбу лойиҳаларни ўз вақтида ишга тушириш ва узлуксиз ишлашини таъминлаш мақсадида уларнинг ҳар бирига вазирликлар, тармоқ бирлашмалари, маҳаллий ҳокимликлар раҳбарлари бириктирилган.
Худди шу тартибда экспорт фаолиятининг кўрсаткичлари ўрганилган. 2021 йилнинг 1 ноябрь ҳолатига кўра, экспорт ҳажмининг кўрсаткичи ўтган йилдагисига нисбатан 30 фоизга ошгани қайд этилган. Тармоқ бирлашмалари ва маҳаллий ҳокимият органлари раҳбарларининг экспорт ҳажмини 2021 йил охиригача режалаштирилган кўрсаткичларга етказиш бўйича чора-тадбирлари тўғрисидаги ҳисоботлари тингланган.
Аввалроқ Шавкат Мирзиёев 2026 йилгача камбағалликни 2 баравар қисқартириш кўзда тутилаётганини айтгани хабар қилинганди. Шунингдек, Президент Ўзбекистон аҳоли даромадлари ўртачадан юқори бўлган давлатлар қаторига чиқишини айтгани ҳақида хабар берилди
