Ўзбекистонда 2022 йилда фуқаролар ташаббуси учун маҳаллий бюджетлар ҳисобидан 1,5 триллион сўм йўналтирилади. Бу ҳақда Молия вазирлиги матбуот хизмати хабар берди.

Ўзбекистон Президентининг 2021 йил 13 апрелдаги «Бюджет жараёнида фуқароларнинг фаол иштирокини таъминлаш бўйича қўшимча чора-тадбирлар тўғрисида»ги қарорига мувофиқ, 2021 йилда эксперимент тариқасида 14 та туман ва шаҳарларда тегишли туман (шаҳар)лар бюджетлари тасдиқланган умумий харажатларининг 5 фоизини жамоатчилик фикри асосида шаклланган тадбирларни молиялаштиришга йўналтириш бўйича янги тартиб жорий этилган. 2022 йилдан бошлаб эса ушбу тартиб барча туман ва шаҳарларга татбиқ этилиши белгиланган.

Маълум қилинишича, 2021 йилда танлаб олинган 14 та ҳудуд учун истисно тариқасида республика бюджетидан жами 92,7 миллиард сўм маблағ ўтказиб берилган. Шунингдек, Молия вазирлигининг расмий веб-сайтида Ўзбекистоннинг «2022 йил учун Ўзбекистон Республикасининг Давлат бюджети тўғрисида»ги қонуни лойиҳаси эълон қилинган.

Қонун лойиҳасига кўра, 2022 йилда жамоатчилик фикри асосида шаклланган тадбирларни молиялаштириш мақсадида туман ва шаҳар бюджетларининг 5 фоизи миқдорида жами 1,5 триллион сўм маблағ йўналтирилиши режалаштирилган. Ушбу маблағлар доирасида фуқаролар томонидан билдирилган 3 мингдан ортиқ долзарб муаммолар ҳал этилишига эришиш кутилмоқда.

Қайд этилишича, фуқаролар ташаббуси учун йўналтирилиши режалаштирилган маблағларнинг ҳудудлар кесимидаги тақсимоти қуйидагича:

• Жами — 1 триллион 553 миллиард;
• Қорақалпоғистон — 99 миллиард;
• Тошкент шаҳри — 77 миллиард;
• Андижон вилояти — 145 миллиард;
• Бухоро вилояти — 91 миллиард;
• Жиззах вилояти — 74 миллиард;
• Қашқадарё вилояти — 142 миллиард;
• Навоий вилояти — 56 миллиард;
• Наманган вилояти — 133 миллиард;
• Самарқанд вилояти — 157 миллиард;
• Сурхондарё вилояти — 128 миллиард;
• Сирдарё вилояти — 49 миллиард;
• Тошкент вилояти — 130 миллиард;
• Фарғона вилояти — 179 миллиард;
• Хоразм вилояти — 93 миллиард.

Шунингдек, 2022 йилда ташаббусли бюджет жараёнлари икки маротаба, феврал ҳамда июль ойларида ўтказилиши режалаштирилган. Таклиф қолдириш ва овоз бериш жараёни бевосита «Очиқ бюджет» (openbudget.uz) ахборот портали орқали амалга оширилади.

Фуқаролардан мазкур жараёнларда фаол иштирок этган ҳолда ўз ҳудудидаги мавжуд долзарб муаммоларни бартараф этилишида ҳамда бюджет маблағларини тўғри тақсимланишида ўз ҳиссасини қўшиши хабарда сўралган.

Аввалроқ Ўзбекистонда давлат бюджети даромадлари 170 триллион сўмдан ортиши кутилаётгани хабар қилинганди. Шунингдек, Ўзбекистонда инвестиция дастурлари доирасида 18,5 триллион сўмлик лойиҳалар амалга оширилиши ҳақида хабар берилди.