2021 йилда аҳоли жон бошига ҳисобланган ялпи ички маҳсулот ҳажми жорий нархларда 21,04 миллион сўм ёки 1983 долларни ташкил этди. Бу ҳақда Давлат статистика қўмитаси Матбуот хизмати хабар берди.

Қайд этилишича, ўтган йилги кўрсаткич 2020 йилга қараганда 5,3 фоизга ўсган. Аҳоли жон бошига ҳисобланган ЯИМнинг ўсиш суръати 105,3 фоизни ташкил этган.

Қўмита маълумотларига кўра, 2021 йилда мамлакат ЯИМ ҳажми жорий нархларда 734,6 триллион сўм ёки 69 миллиард долларни ташкил этган. Ушбу кўрсаткич 2020 йил билан таққослаганда 7,4 фоизга ўсган.

2021 йил якунларига кўра, ЯИМ таркибининг 418,9 триллион сўми товар ишлаб чиқариш, 262,5 триллион сўми хизмат кўрсатиш соҳасига тўғри келган. Шунингдек, маҳсулотларга солинган соф солиқлар 53, 2 триллион сўмни ташкил этган.

Жорий даврда ўртача алмашув курси бўйича ҳисобланган номинал ЯИМ ҳажми 69,2 миллиард долларни ташкил этган. 2020 йилда ушбу кўрсаткич 59,9 миллиард долларни ташкил этган.

Аввалроқ Президент иқтисодий комплекс раҳбарларига ЯИМ, инфляция ва камбағаллик даражаси бўйича бир қанча вазифалар топширгани хабар қилинганди.