Ўзбекистонда алкоголь ва тамаки маҳсулотлари истеъмолини чекловчи қонун лойиҳаси таклиф этилди. Бу ҳақда Олий Мажлис Қонунчилик палатаси матбуот хизмати хабар берди.

Маълум қилинишича, 3 декабрь куни Олий Мажлис Қонунчилик палатасининг навбатдаги мажлиси бўлиб ўтган. Мажлисда депутатлар томонидан «Алкоголь ва тамаки маҳсулотларининг тарқатилиши ҳамда истеъмол қилинишини чеклаш тўғрисида»ги қонун лойиҳасини иккинчи ўқишда моддама-модда кўриб чиқилган.

Қайд этилишича, қонун лойиҳаси алкоголь ва тамаки маҳсулотларининг тарқатилиши ҳамда истеъмол қилинишини чеклаш соҳасидаги муносабатларни тартибга солиш механизмларини такомиллаштириш мақсадида ишлаб чиқилган. Шунингдек, қонун лойиҳаси билан алкоголь ва тамаки маҳсулотлари, тамаки ҳамда никотин истеъмол қилиш учун мосламаларни реализация қилишга доир чекловлар кенгайтирилмоқда.

Таъкидланишича, ўтган вақт мобайнида қонун лойиҳаси қўмита томонидан ўтказилган семинар ва давра суҳбатларида илгари сурилган таклифлар, депутатлар берган тавсиялар атрофлича ўрганилиб маромига етказилган. Қонунчилик техникасидан келиб чиққан ҳолда лойиҳанинг баъзи бир моддалари ўзаро мувофиқлаштирилиб, таркибий жиҳатдан тузатишлар киритилган.

Қонун лойиҳасида алкоголь ва тамаки маҳсулотларини истеъмол қилиш мумкин бўлмаган жамоат жойларнинг аниқ рўйхати кўрсатилиб, чекиш учун ажратилган махсус жойларга минимал талаблар белгиланмоқда. Алкоголь ва тамаки маҳсулотлари ишлаб чиқарувчиларининг мажбуриятлари қонун лойиҳасида ўз аксини топяпти.

Хусусан, ноқонуний айланманинг олдини олиш учун импорт қилувчи ва ишлаб чиқарувчилар томонидан маҳсулотларни рақамли маркировкалаш, ишлаб чиқариш ҳажмлари ва айланмасини ҳисобга олиш ахборот тизимларининг татбиқ этилиши кўзда тутилмоқда.

Аввалроқ Ўзбекистонда алкоголь нархи оширилгани хабар қилинганди. Шунингдек, Ўзбекистонда алкоголь ва тамаки маҳсулотларини акциз ёрлиқлари билан маркалаш амалиёти ўзгариши ҳақида хабар берилди.