Ўзбекистонда электромобиль импорти ошди
Ўзбекистонга январь-июль ойларида қиймати 40,1 млн долларга тенг бўлган 1314 та электромобиль импорт қилди. Асосий экспортчи — Хитой.
Ўзбекистонга етти ойда 1314 та электромобиль импорт қилинди. Бу ҳақда Давлат статистика қўмитаси хабар берди.
Маълумотларга кўра, 2022 йилнинг январь-июль ойларида Ўзбекистон 10 та хорижий давлатдан қиймати 40,1 миллион долларга тенг бўлган 1314 та электромобиль импорт қилган.
Электромобиль импорти 2021 йилнинг мос даврига нисбатан 901 тага ёки 3,2 бараварга ошган.
Ўзбекистон 2022 йилнинг 7 ойида асосан қўйидаги давлатлардан электромобиль импорт қилган:
- Хитой — 1155 та;
- БАА — 81 та;
- Германия — 29 та;
- Гонконг — 29 та;
- Корея — 7 та;
- Литва — 7 та;
- Эстония — 2 та.
Аввалроқ Шавкат Мирзиёев электромобиль ишлаб чиқариш бўйича амалий ишларни ҳозирдан бошлаш кераклигини таъкидлаганди.
«Яна бир масала — жаҳонда электромобиллар ишлаб чиқариш жадал ривожланиб, автомобиль бозорида салмоқли ўрин эгалламоқда. Биз ҳам бу соҳада ортда қолмаслигимиз учун амалий ишларни ҳозирдан бошлашимиз керак», — деганди Президент йиғилишда.
Шунингдек, Ўзбекистоннинг 2022–2026 йилларга мўлжалланган тараққиёт стратегиясида электромобиль ишлаб чиқариш ва улардан фойдаланиш рағбатлантирилиши маълум қилинганди.