Ўзбекистонда ҳайдовчилик гувоҳномаси учун имтиҳонлар ўтказиш тартиби ўзгарди
Имтиҳонларни топшириши жараёнидаги коррупцион ҳолатларга чек қўйилиши кўзда тутилган
Ўзбекистонда автомактаблардаги назарий ва амалий имтиҳонларни автоматлаштирилган электрон тизим орқали ўтказиш амалиёти жорий этилмоқда. Бу ҳақда Йўл ҳаракати хавфсизлиги бош бошқармаси матбуот хизмати хабар берди.
Маълум қилинишича, Ўзбекистон Президентининг 2020 йил 7 декабрда «Давлат томонидан тартибга солинадиган соҳаларга хусусий секторни жалб этиш бўйича қўшимча чора-тадбирлар тўғрисида»ги қарори қабул қилинган. Унинг ижроси доирасида ҳайдовчилик гувоҳномасини олиш учун назарий ва амалий имтиҳонларни ўтказиш ҳуқуқига эга бўлган тадбиркорлик субъектлари томонидан ташкил қилинган хусусий имтиҳон марказлари ўз фаолиятини бошламоқда.
Қайд этилишича, марказларда имтиҳонлар тўлиқ инсон омилидан холи тарзда, автоматлаштирилган электрон тизим орқали қабул қилиниши режалаштирилган. Бу ҳайдовчилик гувоҳномасини олиш учун назарий ва амалий имтиҳонларни топшириши жараёнида эътирозларга сабаб бўлаётган коррупцион ҳолатларга чек қўяди.
Шуни инобатга олиб, барча автомактаблар маъмуриятидан ўз ўқувчиларига йўл ҳаракати қоидаларини пухта ўргатиб, ҳайдовчилик ҳуқуқини олиш масаласига масъулият билан жиддий эътибор қаратиши сўралган.
Аввалроқ Ўзбекистонда эски ҳайдовчилик гувоҳномасини алмаштириш муддати 1 йилга узайтирилгани хабар қилинганди. Шунингдек, Ўзбекистонда йўл қоидасини бузганлик учун айрим жарималар миқдори камайтирилиши ҳақида хабар берилди.
