Президент Шавкат Мирзиёев 1 январдан барча маҳаллаларда ҳоким ёрдамчилари фаолиятини бошлашини маълум қилди. Бу ҳақида Президент матбуот котиби хабар берди.

Маълум қилинишича, давлат раҳбари 2 декабрь куни ўтказилган видеоселектор йиғилишида ҳар бир маҳаллада тадбиркорликни ривожлантириш, бандликни таъминлаш ва камбағалликни қисқартириш масалалари бўйича ҳоким ёрдамчиси фаолиятини ташкил этиш масалаларига тўхталиб ўтган.

Қайд этилишича, ҳоким ёрдамчилари 1 январдан барча маҳаллаларда фаолиятини бошлайди. Уларнинг ишини самарали ташкил этиш мақсадида бир йил давомида доимий фаолият юритадиган «Маҳаллабай ишлаш штаби» тузилади. Шунингдек, ҳар бир туман ва шаҳарга вазирлик, марказий идоралар ва банклардан 1–3 нафардан масъул ходим бириктирилади. Улар 1 йилга туманга хизмат сафарига юборилади ва иш жойи, ойлик иш ҳақи сақлаб қолинади.

Таъкидланишича, ўзини яхши кўрсатган ҳоким ёрдамчилари ва республика вакиллари мукофотланади, жумладан, йил натижалари бўйича эса «Янги Ўзбекистон ислоҳотчиси» кўкрак нишонига тавсия қилинади. Шу билан бирга, уларга ипотека асосида квартира олишда 50 фоизгача субсидия ажратилади.

Бундан ташқари, бош вазир қабулхоналари ва Тадбиркорликни ривожлантириш агентлиги негизида Маҳаллабай ишлаш ва тадбиркорликни ривожлантириш агентлиги ҳамда туман (шаҳар)ларда маҳаллабай ишлаш ва тадбиркорликни ривожлантириш марказлари ташкил этилади.

Аввалроқ Ўзбекистонда ипотека кредити олишда қариндош бўлмаган шахслар кафил бўлишига рухсат берилгани хабар қилинганди.