Ўзбекистонда Вазирлар Маҳкамасининг қарорига мувофиқ кўчмас мулк ижара шартномаларини ҳисобга қўйиш интерактив хизмати — E-ijara дастури синовдан ўтказилмоқда. Бу ҳақда Давлат солиқ қўмитаси матбуот хизмати хабар берди.

Маълум қилинишича, дастурда юридик ва жисмоний шахслар кўчмас мулк объектлари учун тузилган ижара ёки текин фойдаланиш тўғрисидаги шартномаларини Давлат солиқ хизмати органларида ҳисобга қўйишлари мумкин бўлади. Бунда, ижарага олувчи кўчмас мулкни иккиламчи ижарага бериш учун ижарага берувчи (мулкдор)дан рухсат олиши лозим.

Қайд этилишича, иккиламчи ижара шартномасини ҳисобга қўйиш қуйидагича амалга оширилади:

• мулкдор иккиламчи ижарага рози бўлса, дастурда ижара шартномаси ҳисобга олинаётганда «иккиламчи ижара» тугмасига белги қўйиши керак;
• «Иккиламчи ижара» тугмаси босилмаган тақдирда мулк эгаси объектини иккиламчи ижарага беришга рози эмас деб ҳисобланади;
• дастурнинг «Кўчмас мулк объекти» сатрида мулкдор объекти ва ижарага олинган бошқа объектлар шаклланади;
• ижарага олган шахс объектни иккиламчи ижарага бериши учун ижарага олган объектини танлаши лозим;
• иккиламчи ижарага берилаётган объект бўйича мулкдорга автомат тарзда SMS хабар юборилади.

Вазирлар Маҳкамасининг қарорга мувофиқ, 2022 йил 1 январдан кўчмас мулкни ижарага бериш (олиш) ёки текин фойдаланиш шартномаларини E-ijara дастурида ҳисобга қўймаслик солиқ хавфининг юқори мезонларидан бири сифатида баҳоланади. Шунингдек, бундай ҳолат ҚҚС гувоҳномасининг вақтинча тўхтатилишига ёки ҚҚС тўловчи сифатида махсус рўйхатдан ўтиш учун тақдим этилган аризаларининг рад этилишига сабаб бўлиши мумкин.

Аввалроқ Ўзбекистонда кўчмас мулкни баҳолашнинг янги методи синовдан ўтказилгани хабар қилинганди. Шунингдек, Ўзбекистонда 25 ёшгача бўлган ходимларга тўланган ижтимоий солиқ суммаси қандай қайтариб олиниши ҳақида хабар берилди.