Тошкент шаҳрининг Яккасарой туманида яшовчи фуқаро Раҳимжон Расулов хонадонида 6 кВт қувватли кичик қуёш фото электр станцияси ўрнатиб, ишлаб чиқарилган электр энергиясининг ўз эҳтиёжларидан ортган қисмини ҳудудий электр тармоқлари корхонасига сотишни бошлади. Бу ҳақда Энергетика вазирлиги матбуот хизмати хабар берди.

Маълум қилинишича, хонадонга ўрнатилган станция орқали йилига 7 мингдан 10 минг кВт/соатгача электр энергияси ишлаб чиқарилади. 3 ноябрь куни мазкур хонадон эгаси ва Энергетика вазирлиги тизимидаги Тошкент шаҳар электр тармоқлари корхонаси ўртасида «Қайта тикланувчи энергия манбаларининг кичик объектларидан ишлаб чиқарилган электр энергиясини сотиб олиш тўғрисида» шартнома имзоланган.

Шартнома бўйича, ушбу хонадонда ишлаб чиқарилган электр энергиясини ҳудудий электр таъминоти корхонаси томонидан кафолатланган тарзда сотиб олинади.

Қайд этилишича, ушбу шартнома умумий ўрнатилган қуввати 1 МВт гача (ўзгарувчан ток) бўлган қайта тикланувчи энергия манбалари объектларидан, (микро ва кичик гидроэлектр станциялардан ташқари) электр энериясини харид қилишга тааллуқлидир.

Таъкидланишича, мазкур амалиёт Вазирлар Маҳкамасининг 2019 йил 22 июлдаги қарори билан тасдиқланган «Электр энергияси, шу жумладан, энергиянинг қайта тикланадиган манбаларидан электр энергияси ишлаб чиқарадиган тадбиркорлик субектларини ягона электр энергетика тизимига улаш регламенти»га асосан амалга оширилади.

Бунда ҳудудий электр тармоқлари корхоналари томонидан электр энергиясини сотиб олиш Ўзбекистон Республикаси Президентининг 2020 йил 10 июлдаги қарорида белгиланган тарифга асосан амалга оширилади.

Хабарга кўра, шу каби ишлаб чиқарилган электр энергиясини умумий тармоққа сотиш — АСКУЭ тизими доирасида ўрнатилган замонавий электрон ҳисоблагичлар орқали амалга оширилади.

Шунингдек, шахсий қуёш фотоэлектр станцияларини (1 мегаватгача) ўрнатиш истагида бўлган фуқаролар станцияларини ягона энергетика тизимига уланган ҳолда фойдаланишлари ҳамда ўз эҳтиёжларидан ортган қисмини ҳудудий электр тармоқлари корхоналарига юқоридаги қарорларга асосан шартнома асосида сотишлари мумкинлиги хабарга қўшимча қилинган.

Ушбу хонадон эгаси қилинган харажатларининг бир қисмини қоплаб берилиши юзасидан Вазирлар Маҳкамасининг 2021 йил 14 апрелдаги қарорида кўзда тутилган компенсация ажратилиши бўйича туман ҳокимиятига мурожаат қилган.

Аввалроқ Ўзбекистонда ишлаб чиқарувчилар томонидан сотиладиган газга акциз солиғи солиш бекор қилингани ҳақида хабар берилганди.