Ўзбекистонда иқлим ўзгаришлари пул-кредит сиёсатига таъсир кўрсатаётгани маълум бўлди
Асосий озиқ-овқат маҳсулотлари таклифи ва молиявий барқарорлик кўрсаткичлари ҳам пул-кредит сиёсатига таъсир қилди
Ўзбекистонда иқлим ўзгаришлари макроиқтисодий ривожланиш шартлари ва пул-кредит сиёсатининг асосий йўналишларини белгилашда таъсир этувчи омиллар қаторига қўшилди. Бу ҳақда Марказий банк матбуот хизмати хабар берди.
Маълум қилинишича, Марказий банк бошқарувининг 2021 йил 21 октябрдаги йиғилишида «Пул-кредит сиёсатининг 2022 йил ва 2023–2024 йиллар даврига мўлжалланган асосий йўналишлари»нинг дастлабки концептуал лойиҳаси маъқулланган.
Унда 2021 йилги ҳисоб-китобларда иқлим ўзгаришлари ва асосий озиқ-овқат маҳсулотлари таклифи, молиявий барқарорлик кўрсаткичлари, амалга оширилиши кўзда тутилаётган ислоҳотлар ва уларнинг кутилаётган натижалари шартли омиллар сифатида инобатга олинган.
Пул-кредит сиёсатининг 2022 йил ва 2023–2024 йиллар даврига мўлжалланган асосий йўналишларини ишлаб чиқишда, биринчи навбатда, иқтисодиётда нархлар ва молиявий барқарорликни таъминлаш, инфляция даражасини 2023 йил якунига қадар 5 фоизгача пасайтириш мақсадларидан келиб чиқилган.
Қайд этилишича, ўрта муддатли макроиқтисодий ривожланиш прогнозлари ташқи ва ички омилларнинг таъсири кўлами ва давомийлигини инобатга олиб асосий ва муқобил сценарийлари ишлаб чиқилган. Сценарийларни шакллантиришда ташқи иқтисодий шароитларнинг ўзгаришлари, халқаро молия ташкилотларининг жаҳон иқтисодиёти ва асосий экспорт товарлари нархлари бўйича прогнозлари, асосий савдо-ҳамкор давлатларда кутилаётган вазиятлар, ички иқтисодий шароитлардаги эҳтимолий тенденциялардан келиб чиқилган.
Аввалроқ Марказий банк ва МДҲ Молия-банк кенгаши раҳбарияти ўртасида учрашув ўтказилганди.
