Ўзбекистонда IT соҳаси бўйича иш таклифлари сўнгги 4 йилда қанчага кўпайди?
HeadHunter’нинг Kommers.uz’га маълум қилишича, 2022 йилнинг биринчи ярмида IT соҳасида ўртача иш ҳақи 9 млн сўмни ташкил этган.
Ўзбекистонда IT соҳаси бўйича иш таклифлари сўнгги 4 йилда 6 баравардан кўпроққа кўпайди. Бу бўйича таҳлилни HeadHunter Kommers.uz’га тақдим этди.
Қайд этилишича, сўнгги тўрт йилда «Ахборот технологиялари, интернет, телеком» йўналиши бўйича бўш иш ўринлари сони 6 баробардан зиёдга кўпайган. 2022 йилнинг биринчи ярмида ўзбекистонлик иш берувчилар 4,5 мингга яқин бўш иш ўринлари бўйича эълон жойлаштирган.
Иш берувчиларнинг бўш иш ўринлари бўйича эълонларида энг кўп талаб қилинаётган мутахассисликлар қуйидагилардир:
- Дастурлаш, ишлаб чиқиш
- Веб-муҳандис
- Веб устаси
- Тизим администратори
- Тармоқ технологиялари
- Ўйин дастурлари
- Тизим интеграцияси
- Маълумотлар базаси администратори
- Тест қилиш
- Компьютер хавфсизлиги
Шунингдек, 2022 йилнинг биринчи ярмида Ўзбекистоннинг 20 мингдан ортиқ фуқароси ахборот технологиялари соҳасида иш излаган. 2022 йилда иш изловчиларнинг фаол резюмелари сонининг ўсиши 2019 йилга нисбатан 10 баробарга ошган.
Ариза берувчиларнинг резюмеларида энг кенг тарқалган мутахассисликлар қуйидагилар:
- Дастурчи, ишлаб чиқувчи
- Дизайнер, рассом
- Тизим администратори
- Техник ёрдам бўйича мутахассис
- Ахборот хавфсизлиги бўйича мутахассис
- Тест қилувчи
- Тизим муҳандиси
- Тармоқ муҳандиси
- Бадиий раҳбар, ижодий раҳбар
- Ўйин дизайнери
Маошлар
Таъкидланишича, Ўзбекистонда 2022 йилнинг биринчи ярмида IT соҳасида ўртача иш ҳақи 9 миллион сўмни ташкил этган. 2021 йилга нисбатан иш ҳақининг ўсиши 45 фоизни ташкил қилган.
Таҳлил HeadHunter Ўзбекистон томонидан иш берувчиларнинг бўш иш ўринлари бўйича эълонлари ва HeadHunter веб-сайтида (hh.uz) жойлаштирилган резюмелар асосида тайёрланган.