Ўзбекистонда коллеж ва техникум ўқувчиларига ҳам стипендия берилиши мумкин
Президент қарори муҳокамага қўйилди.
Ўзбекистонда дуал таълимни жорий қилган профессионал таълим муассасаларида ўқувчиларга стипендия ёки моддий рағбатлантириш тизими жорий этилиши мумкин. «Профессионал таълим тизимини янги босқичга олиб чиқиш юзасидан ислоҳотларни жадаллаштириш ва касбий кўникмаларни ривожлантириш чора-тадбирлари тўғрисида»ги Президент қарори муҳокамага қўйилди.
Қайди этилишича, дуал таълим шаклини жорий қилган профессионал таълим муассасасининг ички имкониятларидан келиб чиқиб ўқувчилар учун стипендия ёки моддий рағбатлантиришлар жорий этилади.
Шунингдек, дуал таълим шаклини жорий қилган профессионал таълим муассасаларига қуйидаги масалалар бўйича бўйсунувидаги вазирлик ёки идоралар билан келишилган ҳолда мустақил қарор қабул қилиш ваколати берилади:
- дуал таълимга тегишли бўлган касблар ва мутахассисликлар бўйича қабул параметрларини тасдиқлаш;
- дуал таълимнинг ўқув режасига мувофиқ белгиланган фанлар бўйича ўқитиш материаллари тўпламларини, электрон таълим ресурсларини ишлаб чиқиш ва амалиётга жорий этиш;
- ички имкониятларидан келиб чиққан ҳолда дуал таълим учун зарур бўладиган ўқув адабиётлар шу жумладан хорижий ўқув адабиётлар ва қўлланмаларни харид қилиш.
Шунингдек, дуал таълим шаклидаги гуруҳларда таълим олаётган ўқувчиларни бир таълим муассасасидан бошқа таълим муассасасидаги дуал таълим шаклидаги гуруҳга ўқишини кўчиришни ўзаро келишув асосида ҳал этиш ҳам амалга киритилиши мумкин.
