Ўзбекистонда кўп квартирали уйларни бошқариш қоидалари тасдиқланди. Бу ҳақда Адлия вазирлигининг Huquqiy axborot канали хабар берди.

Маълум қилинишича, ҳукумат қарори билан кўп квартирали уйларни бошқариш фаолиятини амалга ошириш қоидалари тасдиқланган. Низомга мувофиқ, кўп квартирали уйларни бошқариш фаолияти уй-жойдан фойдаланишда қулай ва хавфсиз шароитларни яратиш, умумий мол-мулкни сақлаш ва ундан фойдаланиш учун зарур хизматлар ва ишларни қамраб олади.

Қайд этилишича, кўп квартирали уйни бошқариш органи уйга кириш қисмида қуйидаги маълумотларни доимий жойлаштириб бориши шарт:

• бошқариш органининг номи, манзили, телефони, иш тартиби, веб-сайти;
• коммунал хизмат кўрсатувчи ташкилотларнинг алоқа телефонлари;
• таъмирлаш ишлари вақти;
• мажбурий бадал, кўрсатиладиган хизматлар учун тўлов миқдори.

Шунингдек, бошқариш органи авария вазиятларини бартараф этадиган 24 соат ишлайдиган авария-диспетчерлик хизматини ташкил этиши керак. Бунда авария-диспетчерлик хизмати мулкдорларнинг қўнғироқларига 3 минутдан кўп бўлмаган вақтда жавоб бериши лозим.

Бундан ташқари, хонадонлардаги канализациялар тиқилиб қолганида ва ифлосланиш ҳолатлари бўлганида бу ҳолатлар 2 соатда бартараф этилиши керак. Совуқ сув, иссиқ сув, иссиқлик ва электр таъминоти ҳамда канализация авариявий шикастланганда бу ҳолатлар 3 кунда бартараф этилади.

Аввалроқ Ўзбекистонда кўп квартирали уйлар 1 гигабайт/секунд тезликдаги интернетга уланиши хабар қилинганди. Шунингдек, Ўзбекистонда уй-жойга муҳтож хотин-қизларни хонадон билан таъминлаш тартиби белгилангани ҳақида хабар берилди.