Ўзбекистонда пахта йиғим-терим харажатларини молиялаштириш тизими такомиллаштирилади. Бу ҳақда Huquqiy axborot канали хабар берди.

Маълум қилинишича, «Пахта хомашёсини етиштириш ва унинг йиғим-терим харажатларини молиялаштириш тизимини такомиллаштириш чора-тадбирлари тўғрисида»ги Президент қарори қабул қилинган. Қайд этилишича, 2022 йил ҳосилидан пахта етиштиришни ва йиғим-теримини Қишлоқ хўжалигини давлат томонидан қўллаб-қувватлаш жамғармасидан молиялаштиришнинг қуйидаги тартиби жорий этилади:

• пахта етиштириш ва йиғим-теримни имтиёзли молиялаштириш кластерлар ва Уруғчиликни ривожлантириш марказидаги элита уруғчилик хўжаликлари орқали амалга оширилади;
• банклар томонидан жамғарма ресурсларидан қуйидагилар учун имтиёзли кредитлар ажратилади:
• пахта-тўқимачилик кластерларига пахта етиштириш учун — пахта қийматининг 60 фоизигача миқдорда йиллик 10 фоиз 24 ойга, 18 ойлик имтиёзли давр ва 19 ойдан бошлаб сўнгги 6 ой давомида тенг улушларда қайтариш шарти билан;
• элита уруғчилик хўжаликларига пахта етиштириш учун — пахта қийматининг 60 фоизигача йиллик 10 фоиз ставкада 14 ойга;
• пахта-тўқимачилик кластерлари ва элита уруғчилик хўжаликларига пахта йиғим-теримини молиялаштириш учун — пахта қийматининг 20 фоизигача миқдорда йиллик 10 фоиз 12 ойга, 3 ойлик имтиёзли давр билан.

Шунингдек, пахта-тўқимачилик кластерларига пахта хариди бўйича якуний ҳисоб-китоб учун 12 ойгача миллий валютадаги кредитлар бўйича фоиз ставкасининг Марказий банк асосий ставкасидан ошадиган, лекин 10 фоиз пунктидан кўп бўлмаган қисмини қоплаш учун жамғарма ҳисобидан компенсация тўланади. Қишлоқ хўжалиги маҳсулотлари етиштирувчилар минерал ўғит, ёқилғи-мойлаш, техникага оид масалалар, уларни импорт қилишни мустақил ҳал қилади, бунга ҳар қандай тарзда аралашиш тақиқланади.

Аввалроқ Халқаро тикланиш ва тараққиёт банки Ўзбекистон қишлоқ хўжалигига 19,5 миллион евро ажратгани хабар қилинганди. Шунингдек, Ўзбекистонда қишлоқ хўжалигини қўллаб-қувватлаш учун 100 миллион доллар ажратилиши ҳақида хабар берилди.